Нэгдүгээр сарын 14-ний өдөр Украины Днипро хотын орон сууц Оросын пуужингийн цохилтод өртөх үеэр 46 хүн амь үрэгдэж, 80 гаруй хүн шархадсан билээ. Амь үрэгдэгсдийн дотор зургаан хүүхэд байв.
Энэ нь Украины дайн эхэлсэн цагаас хойш хамгийн олон энгийн номхон иргэн нэг дор амиа алдсан тохиолдол болсон юм.
Хэдийгээр хуулиар хориотой ч Оросын зарим хотуудад иргэд хувиараа Украины амь үрэгдсэн иргэдийн дурсгалыг хүндэтгэсээр байна. Ингэхдээ тэд Украины урлаг соёлын алдартай хүмүүсийн хөшөө дурсгалуудын дэргэд цэцэг, тоглоом, ном, лаа зэргийг тавьж, хүндэтгэл үзүүлж байгаа ажээ.
Тухайлбал Даваа гарагт Москва хот дахь яруу найрагч Леся Украинкагийн хөшөөний дэргэд дурсгалын зүйлс олноор цугларсан байна.
Хотын цагдаагийн газар хүндэтгэл үзүүлсэн хүмүүсээс тавыг баривчилж, цугларсан эд зүйлсийг хэд хэдэн удаа хураасан ч иргэдийн цуваа тасраагүй гэнэ.
Сүүлдээ хууль сахиулагчид уг хөшөөний дэргэд хөдөлгөөнт эргүүлийн автомашиныг байрлуулжээ.
Хөшөөнд цэцэг тавьсан 63 настай математикч Елена Иванова “Энэ эмгэнэлт явдлын талаар сэтгэгдлээ би өөр яаж илэрхийлэх билээ? Зовж шаналсан хүмүүсийн төлөө би эмгэнэн гашуудаж байна. Үүнээс өөр сонголт алга” гэж AFP агентлагийн сэтгүүлчид ярьсан юм.
Москвагаас гадна Санкт Петербург, Краснодар, Екатеринбург зэрэг хотуудад Украинтай холбоотой хөшөөнүүдийн дэргэд иргэд Днипрогийн хохирогсдын дурсгалд хүндэтгэл үзүүлцгээжээ.
Эх сурвалж: AFP, The Moscow Times
