Исфахан хот дахь цэргийн байгууламжуудад нь дроноор довтолсныг таслан зогсоосон тухай Ираны батлан хамгаалах яам Ням гарагт мэдээлжээ.

Нийт гурван дрон довтолсны нэгийг нь агаараас хамгаалах систем устгаж, хоёрыг нь “урхинд оруулж” гартаа оруулсан тухай тус яам мэдээлсэн юм. Энэ үеэр хүний амь хохироогүй, байшин барилгад бага зэргийн гэмтэл учирсныг бас мэдээлжээ.

Довтолгоог хэн үйлдсэн тухай одоогоор нэр заагаагүй байна.

Пентагоны хэвлэлийн төлөөлөгч, бригадын генерал Патрик Райдер уг ажиллагаанд АНУ-ын зэвсэгт хүчин оролцоогүйг баталсан ч өөр хэн үйлдсэн талаар таамаг дэвшүүлэхээс зайлсхийжээ.

Иран улс Украины дайнд ашиглах зэр зэвсгийг ОХУ-д нийлүүлсэн, цөмийн зэвсэг бүтээх хөтөлбөр хэрэгжүүлж буй гэсэн асуудлуудаар шүүмжлүүлж буй цаг үед дээрх довтолгоо болж байна.

Бас Ираны дотоодод засгийн газрын эсрэг иргэдийн тэмцэл үргэлжилж байгаа.

Орон нутгийн цагаар Бямба гарагийн оройн 23:30 цагт болсон дроны довтолгоо Исфахан хот дахь зэвсгийн үйлдвэрт чиглэсэн байсныг IRNA агентлаг мэдээлжээ.

Исфаханы бүс нутагт Ираны томоохон агаарын бааз, цөмийн судалгааны хэд хэдэн байгууламжууд байрладаг. Тухайлбал тус бүсийн Натанз хот бол Ираны уран баяжуулах хөтөлбөрийн гол төв юм.

Сүүлийн жилүүдэд Ираны цэргийн, цөмийн, аж үйлдвэрийн байгууламжуудад дараалсан дэлбэрэлт, гал түймэр, кибер халдлага гарах болсон. Энэ бүгдийн ард Израиль улс байгаа гэж Тегераны эрх баригчид буруутгадаг.

2021 онд Натанз хотын ойролцоох цөмийн судалгааны байгууламжид хорлон сүйтгэх ажиллагаа явагдсаны дараа Ираны тал Израил улсыг буруутгаж байв. Дараа нь Израилын батлан хамгаалахын сайд хэлэхдээ бүс нутагт явуулж буй ажиллагаануудаа “дайсны нүднээс нуух шаардлагагүй” гэж мэдэгдэж байжээ.

2020 онд Ираны цөмийн технологийн гол мэргэжилтэн Мохсен Фахризадех алагдахад Тегераны эрх баригчид бас Израил улсын тусгай албадыг буруутгаж байлаа.

Эх сурвалж: BBC