Зөвлөлтийн удирдагч агсан Иосиф Сталиний хүрэл цээж баримлыг нээх ёслолын ажиллагаа өчигдөр ОХУ-ын Волгоград хотод болжээ.
Өнөөдөр тус хотод дэлхийн хоёрдугаар дайны үеэр болсон Сталинградын тулааны ялалтын 80 жилийн ойг өргөн хүрээнд тэмдэглэх юм.
Уг ажиллагаанд ОХУ-ын ерөнхийлөгч Владимир Путин биечлэн оролцож, цэргийн парад жагсах төлөвлөгөөтэй байна.
Олон сая хүний амийг золиосолсон харгис дарангуйлагч байсан гэгддэг Сталиний ихэнх хөшөөг хуучин Зөвлөлтийн бүрэлдэхүүнд болон нөлөөнд байсан улс орнуудад буулгасан байдаг.
Харин ОХУ-д эсрэгээрээ сүүлийн жилүүдэд Сталиний түүхэнд гүйцэтгэсэн үүргийг эергээр үнэлэх, алдаршуулах үзэгдэл нэмэгдэж байгаа.
РИА Новости агентлагийн цацсан дүрс бичлэгт Сталинградын тулааны дурсгалын музейн ойролцоо Сталиний цээж баримлыг нээх ёслолын ажиллагаа болсныг харуулжээ.
Сталинаас гадна Зөвлөлтийн маршал Георгий Жуков, Александр Василевский нарын цээж баримлыг хамтад нь нээсэн байна.
Эдгээрийг Волгоградын оршин суугч, барималч Сергей Щербаков бүтээжээ.
“Маш богино хугацаанд бүтээх захиалга авснаа амжилттай дуусгалаа” гэж тэр орон нутгийн хэвлэлд ярьсан байна.
Украинд явуулж буй дайны ажиллагаагаа Оросын эрх баригчид Нацист Германы эсрэг дайнтай адилтгаж, Украин улсыг “нацизмаас цэвэрлэх” зорилготой гэж сурталчилж байгаа билээ.
Эх сурвалж: AFP
