Тэрбумтан Илон Маск, Израилын ерөнхий сайд Бенжамин Нетаньяху нар
Хуучнаар Твиттер сошиал платформыг өнгөрсөн онд $44 тэрбумаар худалдаж авсан Илон Маск бизнес загварт нь томоохон өөрчлөлт хийхээр төлөвлөж байгаагаа ярьжээ.
Даваа гарагт тэр Израилын ерөнхий сайд Бенжамин Нетаньяхутай уулзахдаа Х платформоор антисемитист үзлийг түгээн дэлгэрүүлэх явдалтай хэрхэн тэмцэх талаар ярилцсан юм.
Бүх хэрэглэгчдээс бага хэмжээний сарын суурь хураамж авдаг болох нь буруу үзэл суртлыг түгээдэг “ботуудын армитай” тэмцэх хамгийн сайн арга гэж үзэж байгаагаа Маск энэ үеэр тайлбарлажээ.
Маскийг худалдаж авснаас хойш уг сошиал платформд контентын хяналтын бодлого алдагдаж, нийгэмд сөрөг нөлөөтэй агуулгууд илүү ихээр тарах болсон гэж ажиглагчид шүүмжилдэг.
Харин үүнтэй тэмцэхийн тулд бүх хэрэглэгчдийг төлбөртэй болговол хэрэглээ нь буурч, орлогын гол эх үүсвэр болдог зар сурталчилгааны зах зээлээ алдах аюултайг мэргэжилтнүүд анхааруулж эхэлсэн байна.
Өнгөрсөн долдугаар сард Маск зар сурталчилгааны орлогынхоо бараг тал хувийг алдаад байгааг нэг арга хэмжээний үеэр ярьж байв.
Хүн биш, компьютерын программ цаана нь ажилладаг ботууд Х платформд их хэмжээтэй байдаг ба эдгээрийг ашиглан улс төрийн болон янз бүрийн үзэл суртлын агуулгыг олон нийтэд түгээдэг юм.
Антисемитист үзлийг ботуудаар түгээх үзэгдлийн эсрэг ямар арга хэмжээ авах бодолтой байгааг нь Израилын ерөнхий сайд Маскаас асуужээ.
“Платформыг ашигласны төлөө бүх хэрэглэгчдээс бага хэмжээний сарын суурь хураамж авдаг болох” төлөвлөгөөтэй байгаагаа Маск хариулсан байна.
“Үүнийг би ботын армитай тэмцэх хамгийн оновчтой арга гэж бодож байна” гэж тэр тайлбарлажээ.
Эх сурвалж: AFP
