НҮБ-ын ерөнхий ассамблейн 78 дугаар чуулганы ерөнхий санал шүүмжлэлийн хэсэг өчигдөр Нью-Йорк хотод эхэллээ.

Уг хэлэлцүүлэгт НҮБ-ын гишүүн 140 гаруй улсын төрийн тэргүүн, засгийн газрын гишүүд өөрт оногдсон 15 минутын хугацаанд олон улсын санаа зовоосон асуудлуудаар байр сууриа илэрхийлэх юм.

Украины дайн эхэлсэн цагаас хойш анх удаа тус улсын ерөнхийлөгч Володимир Зеленский өчигдөр энэ арга хэмжээнд биечлэн оролцлоо.

Тэрбээр газар нутагт нь халдан довтолсон Оросын эзлэн түрэмгийллийг дэлхийн дэг журмыг устгах аюул хэмээн тодорхойлж, үүний эсрэг тэмцэхийг дэлхийн бүх улс орнуудад уриалжээ.

“Бид түрэмгийлэгчдийг ялахын тулд нэгдмэл байж, бүх хүч чадлаа төвлөрүүлэх ёстой. Ийм түрэмгийллийг дахин гаргуулахгүй байхын тулд бид эвлэлдэн нэгдэх хэрэгтэй” гэж Зеленский хэлсэн юм.

Тэрбээр эзлэн авсан нутаг дэвсгэрээ хүлээн зөвшөөрүүлэхийн тулд дэлхий нийтийн хүнсний хомсдолыг зэвсэг болгон ашиглаж буйд Москвагийн эрх баригчдыг буруутгажээ.

Зеленский бас Украины хүүхдүүдийг хулгайлж, геноцид үйлдэж буй Оросын төрийг хурцаар шүүмжилж, дэлхийн хэмжээний энх тайвны чуулганыг Киев хотод зохион байгуулахаар бэлдэж байгаагаа дуулгасан юм.

НҮБ-ын чуулганы эхний өдрийн хэлэлцүүлгийн гол сэдвүүдийн нэг Украины дайн байлаа.

Энэ өдөр үг хэлсэн хэд хэдэн улсын төрийн тэргүүн Украиныг үргэлжлүүлэн дэмжихээ амласан юм.

АНУ тэргүүтэй Өрнөдийн холбоотнууд 2022 оны хоёрдугаар сард дайн эхэлснээс хойш Украинд олон тэрбумын зэр зэвсэг болон хүмүүнлэгийн тусламж үзүүлээд байгаа.

Өчигдөр НҮБ-ын индэр дээрээс АНУ-ын ерөнхийлөгч Жо Байден бас үг хэлсэн юм.

“Дэлхий нийт залхаж, Украиныг ямар ч үр дагавар, шийтгэлгүйгээр харгислахыг зөвшөөрнө гэдэгт Орос итгэсээр байна. Хэрвээ бид Украиныг хуваахыг зөвшөөрвөл өөр аль нэг улсын тусгаар тогтнолд баталгаа өгч чадах уу? Энэ дайны хариуцлагыг зөвхөн Орос л хүлээнэ. Орос ганцаараа энэ дайныг даруй зогсоох боломжтой” гэж тэр энэ үеэр хэлжээ.

Тэрбээр энэ долоо хоногийн сүүлчээр Цагаан ордонд Зеленскийтэй уулзах юм. Байден Нью-Йорк хотод гурван өдөр саатахдаа Төв Азийн таван улсын төрийн тэргүүнтэй уулзахаас гадна Израил, Бразилын удирдагчидтай уулзана.

АНУ-ын хууль тогтоогчид есдүгээр сарын 30-наас өмнө ирэх оны холбооны засгийн газрын төсвийг батлахаар ажиллаж байгаа.

Зеленский энэ Пүрэв гарагт Вашингтонд очихдоо АНУ-ын конгресст зочлох бөгөөд энэ үеэр Украинд үзүүлэх тусламжийг төсөвт тусгуулах асуудлаар конгрессын төлөөлөгчидтэй уулзах төлөвлөгөөтэй байна.

НҮБ-ын чуулганы үеэр НАТО-гийн ерөнхий нарийн бичгийн дарга Йенс Столтенбэрг хэвлэлд өгсөн ярилцлагадаа Украинд үзүүлэх тусламжийн ач холбогдлыг онцолсон юм.

“Хэрвээ бид дайныг дуусгахыг хүсэж байгаа бол, энх тайван, шударга ёсыг тогтоохыг хүсэж байгаа бол Украинд зэр зэвсгээр туслах нь хамгийн зөв зам юм. Украинд одоо олон төрлийн тусламж дэмжлэг хэрэгтэй байна” гэж тэр хэлжээ.

Эх сурвалж: Aljazeera