Өнгөрсөн онд Персийн буланд тээвэрлэж байхад нь хурааж авсан нэг сая гаруй сумыг Украинд нийлүүлснээ АНУ-ын албаныхан мэдээлжээ.
Уг сумнуудыг Ираны эрх баригчид Йемений Хусит босогчдод НҮБ-ын хоригийг зөрчин хулгайгаар нийлүүлэх гэж байгаад баригдсан юм байна.
“Нэг авторитар дэглэмийн эсрэг авсан арга хэмжээ бас нэг авторитар дэглэмийн эсрэг тэмцлийг дэмжихэд зориулагдаж байна. Бид Украины эрх чөлөө, ардчилал, хууль дээдлэх ёсны төлөө тэмцэлд дэмжлэг үзүүлэхийн тулд бүх эрх мэдлээ үргэлжлүүлэн ашиглах болно” гэж АНУ-ын ерөнхий прокурор Мэррик Гарланд мэдэгджээ.
Нийтдээ 1.1 сая ширхэг 7.62 мм-ийн сумыг ачсан аль нэг улсын харьяалалгүй Marwan1 нэртэй тээвэрлэгчийг 2022 оны арванхоёрдугаар сарын 9-ний өдөр АНУ-ын тэнгисийн хүчний хөлөг Персийн буланд зогсоож байсан юм.
Сумнуудыг Ираны хувьсгалт гвардаас өөрийн холбоотон Йемений Хусит босогчдод илгээсэн байжээ. Хураасан сумнуудыг Украинд илгээхээс өмнө Ойрх Дорнодод хадгалж байсан байна.
Энэ оны гуравдугаар сард АНУ-ын хууль зүйн яам уг ачааг өөрийн өмчлөлд шилжүүлж авахаар шүүхэд хандсан нь долдугаар сарын 20-нд шийдэгдсэн юм.
Эх сурвалж: The Guardian
