Хятад улсын Ханжоу хотод болж буй Азийн Спортын Наадмын хүндийн өргөлтийн тэмцээнүүд үргэлжилж байна.
Энэ төрөлд Умард Солонгосын тамирчид 13 медальтай тэргүүлж байгаагийн зургаа нь алтан медаль юм.
Өчигдөр 76 кг-ын жинд түрүүлсэн тус улсын тамирчин Сон Кук Хян алтан медаль зүүсэндээ баярлахгүй байгаагаа тэмцээний дараа зохион байгуулагдсан хэвлэлийн хурлын үеэр илэрхийлжээ.
Тэрбээр огцом өргөлтөөр 117 кг, түлхэлттэй өргөлтөөр 150 кг, нийт 267 кг өргөсөн амжилт гаргасан юм.
“Би гаргасан амжилтдаа сэтгэл дундуур байна. Миний зорилго дэлхийн дээд амжилтыг тогтоох байсан. Үүнийг биелүүлж чадаагүйдээ би үнэхээр их ичиж байна” гэж Сон ярьжээ.
Энэ жингийн дэлхийн дээд амжилтыг Умард Солонгосын өөр нэг тамирчин Рим Жон Сим эзэмшдэг юм.
2019 онд Рим огцом өргөлтийн дээд амжилтыг 124 кг-аар, нийлбэр дээд амжилтыг 278 кг-аар шинэчлэн тогтоож байжээ.
Умард Солонгосын хүндийн өргөлтийн тамирчид яагаад ийм хүчирхэг байдгийг асуухад Сон “Бид бүгд манай удирдагч Ким Жон Уны хайр ивээл, дэмжлэгийн ачийг хариулах хүсэлтэй байдагтай энэ нь холбоотой. Бид бүгдээрээ үүний төлөө л энд ирсэн” гэж хариулжээ.
Ханжоу хотод үргэлжилж буй 19 дэх удаагийн Азийн наадам нь 2018 оноос хойш Умард Солонгосын тамирчдын оролцож буй анхны гадаад тэмцээн юм.
Тэд 2018 оны Жакартагийн Азийн наадамд хамгийн сүүлд оролцож, дараа нь 2021 оны Токиогийн зуны олимп, 2022 оны Бээжингийн өвлийн олимпыг алгасаж байв.
2022 оны арванхоёрдугаар сард Умард Солонгосын дэглэм цар тахалтай холбоотой хилийн хоригоо цуцалснаар тамирчид нь олон улсын уралдаан тэмцээнүүдэд оролцох боломжтой болжээ.
Гадаадынханд ихэнхдээ хаалттай байдаг Умард Солонгосын тамирчид өчигдөр хэвлэлийн хуралд идэвхтэй оролцож, сэтгүүлчдийн асуултад чөлөөтэй хариулсан нь ховор үзэгдэл байлаа. Тэд Өмнөд Солонгосын сэтгүүлчдийн асуултад хүртэл дэлгэрэнгүй хариулж, хэл аялгын ялгаанаас үүдэлтэй зарим ойлгоогүй үгээ тайлбарлуулж байжээ.
Эх сурвалж: Yonhap News
