Монгол Улс нефтийн үйлдвэртэй болж, газрын тосоо өөрсдөө үйлдвэрлэдэг болно хэмээн мөн ч олон жил ярьж ирсэн.

Харин өнгөрсөн өвөл Ерөнхий сайд У.Хүрэлсүх  Засгийн газрын ээлжит хуралдаанаараа Дорноговь аймгийн Алтан Ширээ суманд Нефть боловсруулах үйлдвэр барих шийдвэр гаргасан. Одоо л нэг үйлдвэртэй болох нь дээ гэж олон түмэн баярласан юм даг.

Сүүлийн жилүүдэд шатахууны үнэ огцом нэмэгдэж байгаа бөгөөд мөн хуурамч шатахуун гаднаас импортоор оруулж ирж худалдаалах хууль бус хэрэг хэрээс хэтэрсэн байгаа юм. Тиймээс монголчууд өөрсдөө нефтийн үйлдвэртэй болж, шатахууны үйлдэрлэж, хэрэгцээгээ хангадаг байя, газрын тосны нөөц ч их байгаа учраас үйлдвэр барих боломжтой гэж үзсэн юм.

Тухайн үед Ерөнхий сайд У.Хүрэлсүх хэлэхдээ “Алтан Ширээ сумын нутаг дахь 150 га талбайг улсын тусгай хэрэгцээнд авахаар шийдвэрлэсэн.  Тус  150 га талбай нь Сайншандаас 20 км зайтай. Энэ оны 2-р улиралд бүтээн байгуулалтын ажлууд эхлэх болно. Мөн тэрээр нефтийн үйлдвэрийн  зам болон, эрчим хүчний асуудлыг шийдэж гүйцэтгэх газруудыг яриандаа дурдсан. Үүнд: 20 км урттай  төмөр замын ажлыг  УБТЗ,  Хүнд  даацын тусгай зориулалтын авто замын барилгын ажлыг БХЯ, Эрчим хүч дамжуулах шугамын ажлыг ЦДС ТӨК тус тус хийж гүйцэтгэнэ” гэсэн.

Түүнчлэн сайд яриандаа онцлохдоо эдгээр төслүүд дээр хэн нэгнийг бусармаг зүйл хийлгэхгүйн тулд миний бие тусгайлан анхаарч ажиллах болно. Үүний тулд Үндэсний аудитын газар, ТЕГ, АТГ, ЦЕГ, МХЕГ гэх мэт хяналтын байгууллагуудын төлөөлөл бүхий ажлын хэсэг байгуулж төслийн гүйцэтгэлийн үе шат бүрд хяналт тавьж ажиллана” гэжээ. Тэгвэл хаврын улирал дуусч, зуны сар гарлаа үйлдвэрийн сураг чимээ алга.

Ерөнхий сайдын хэлсэн үгийн амлалтыг өнөөдөр ард түмэн Монголын шатахуун үйлдвэрлэгчдийн холбоо нэхэж, шаардаж эхэллээ. Ямар үйлдвэр яаж барих гээд байгаа ч тодорхой бус. Хаанаа ямар шатандаа гацсан талаар ч мэдээлэл байхгүй байгаа. Тиймээс бид хуурамч шатахуун түгээх газруудын булхайг илчилж, төрийг ажлаа хийтэл, нефтийн үйлдвэрээ баритал нь тэмцэх болно хэмээн дээрх холбооны тэргүүн О.Бямбадэлгэр ярьжээ.

О.Сайхан
Оллоо.mn