Даатгалын байгууллагуудыг шүүмжлэх, гомдолох иргэдийн тоо сүүлийн үед нэлээд ихсэх болов. Цахим сүлжээгээр ч цөөнгүй хүмүүс даатгалын газрын хүүгийн дарамтанд орж буйгаа илэрхийлсээр байгаа. Тэр дундаа Практикал даатгалын талаар бүр ч их санал, гомдол хөврөх болж. Ер нь бол "бэлэн мөнгөний асуудлыг бүрэн шийднэ" гэсэн зар FM сонсогчдын чихэнд хэдийнээ танил болсон. Гэвч бэлэн мөнгөний асуудал шийдэх бус дарамт үүсгэж буйг олон харилцагчид нь удаа дараалан гомдол нэхэж буй.
"Автомашинаа унаад зээл ав" гэх зарын дагуу олон жолооч очиж өөрийн машиныг барьцаалан зээл авч хүүгийн дарамтанд орсоор байна. Уг нь бол бага хүүтэй хэдхэн төгрөг аваад асуудлаа шийдчих санаатай тэд очдог байх л даа. Гэвч тэдгээр байгууллагууд зээлдэгчид өндөр хүү ногдуулахын зэрэгцээ даатгалын байгууллагын хамгийн өндөр төлбөртэй даатгалыг хүчээр санал болгодог байна.
Албан журмын даатгалаар бүхий л жолоочийг даатгахаас гадна санхүүгийн байгууллагуудаар дамжуулан тээврийн хэрэгслийг даатгадаг байна. Тиймээс Практикал даатгал Банк бус санхүүгийн байгууллагуудтай хуйвлдан тохиролцдог байна. Авахдаа хурдан шуурхай ажилладаг ч өгөхдөө гар татан хохирлоо нөхөн төлүүлэх гэсэн даатгагчдыг хохиролтой нь хаях аргаа бүх талаар хайдаг нь даатгалын компанийн санхүүгийн луйвар юм.
Саяхан Практикал даатгалд "вип даатгал" хийлгэсэн хэмээн баярлан, хөл хөөрцөг болж явсан нэгэн жолооч санамсаргүй байдлаар өөрийн машинд бяцхан сэв үлдээж даатгалынхаа хэргийг гаргахаар Практикал даатгалд хандаж бичиг цаасаа өгсөн байна. Гэвч Харамсалтай нь Практикал даатгалаас "та шуурхай яриагүй..." гэх шалтгаанаар хохирол барагдуулах боломжгүй гэсэн байх юм. Өмнө нь тус даатгалын байгууллагад хандах гээд залгахаар утсаа авдаггүй. Тэгээд гэнэтийн төлбөрийн асуудал гараад очихоор ямар нэгэн аргаар нөхөн төлөхөөс зайлсхийдэг байна.
Уг нь бол Практикал даатгалын компанийн гэрээний 7.8-д зааснаар "Даатгуулагч нь нэн даруй мэдэгдээгүй нь даатгагчийн ашиг сонирхолд онц ноцтой хохирол учруулаагүй тохиолдолд даатгагч нь нөхөн төлбөр төлөх хариуцлагаас мултрах үндэслэл болохгүй" хэмээсэн байдаг. Гэрээний заалтыг тайлбарлан хохирсон жолооч нь аргадан, сөгдөн гуйсан ч түүнийг нь нохой хуцсан чинээ тоогоогүй аж.
Ер нь бол жолооч нар хохирсондоо бухимдаад байгаа ч юм биш, хамгийн гол нь хүний мөнгийг авчихаад нөхөн төлөхгүй байгааг луйвар, хулгай гэж хэлэхээс яах билээ. Энэ мэт иргэдийг хохироосон, өөртөө ашигтай луйвруудыг хийж монополь болтлоо хөгжсөн компаниуд манайд цөөнгүй бий. Тэдгээр компаниудыг сонгож үйлчлүүлэх эсэх нь хувь хүний эрх хэдий ч бас тэднийг ингэтэл нь давраах ямар хэрэг байна. Үйлчлүүлэхээ л больчих л доо...
Эх сурвалж: www.SETGUULCH.mn
