Бээжин хотод үйл ажиллагаа явуулдаг Хятадын алдартай судалгааны хүрээлэн YuWa Population Research Institute дэлхийн гол гол улс орнуудын хүүхэд өсгөх зардлыг үндэсний дотоодын нийт бүтээгдэхүүний хэмжээтэй нь харьцуулан гаргаснаа өчигдөр танилцуулжээ.
Ингэхэд жагсаалтыг Өмнөд Солонгос тэргүүлж, Хятад улс удаалсан байна.
Тухайлбал Хятад улсад хүүхдийг 18 нас хүртэл өсгөх дундаж зардал 538,000 юань ($74,836) болсон нь тус улсын нэг хүнд ногдох дотоодын нийт бүтээгдэхүүний хэмжээнээс 6.3 дахин өндөр байжээ.
Энэ харьцаа АНУ-д 4.11, Японд 4.26 байсан байна.
Хятадын том хотуудын дундаж зардал бүр өндөр буюу 667,000 юань ($92,780) байжээ.
Судлаачид зардлыг тооцоолохдоо эцэг эхийн алдагдсан боломжийн үнэ өртгийг нэмж үнэлсэн байна.
Тухайлбал 2010-аас 2018 оны хооронд Хятадад сургуулийн насны хүүхдийнхээ гэрийн даалгаварт зарцуулах эцэг эхийн дундаж хугацаа долоо хоногийн 3.67 цагаас 5.88 цаг болж нэмэгджээ.
Ээжүүд ажил хөдөлмөр эрхлэх цагаа алдахаас гадна амрах цагаа алддаг байна. Аав нар зөвхөн амралтын цагаасаа үүнд алдаж байжээ.
“Хүүхэд төрүүлж өсгөх зардал өндөр, эмэгтэйчүүд гэр бүл, ажил хөдөлмөрөө тэнцвэржүүлэхэд хүндрэлтэй байгаа зэрэг шалтгаануудын улмаас Хятадын хүн амын хүүхэд төрүүлэх сонирхол буурч, дэлхийн хэмжээнд бараг хамгийн доод түвшинд байна” гэж судлаачид дүгнэсэн байна.
Судалгааны ажлыг Бээжингийн их сургуулийн эдийн засгийн ухааны профессор Лян Жянзан удирджээ.
Өнгөрсөн онд Хятад улсын хүн ам хоёр дахь жилдээ дараалан буурсан юм.
2023 онд тус улсад есөн сая гаруй хүүхэд мэндэлсэн нь 2016 оны тооны хагас орчимтой тэнцэж байв.
Бээжингийн эрх баригчид олон арван жил үргэлжилсэн “өрх бүр нэг хүүхэд” бодлогоосоо 2017 онд татгалзаж, гурав хүртэл хүүхэдтэй болохыг зөвшөөрсөн.
Гэхдээ энэ арга хэмжээг хэтэрхий оройтсон гэж судлаачид үзэж байна. Хэдийгээр хязгаарлахаа больсон ч эдийн засгийн дарамтаас шалтгаалан айл өрхүүдийн олон хүүхэдтэй болох сонирхол нэмэгдэхгүй байгаа юм.
“Төрөлт буурч байгаа нь Хятадын эдийн засгийн өсөлтийн чадавх, инновацын эрч хүч, ард иргэдийн аз жаргалын индекс, тэр ч байтугай үндэсний сэргэн мандалтад гүнзгий нөлөө үзүүлж байна. Хятад улс дэлхийд хамгийн бага төрөлттэй байгаагийн үндсэн шалтгаан нь хүүхэд өсгөх зардал хамгийн өндөр байгаатай холбоотой” гэж судлаачид дүгнэжээ.
Эх сурвалж: The Guardian
