Өнгөрсөн Бямба гарагт Ромын католик сүм хийдийн тэргүүний Швейцарын RTS телевизэд өгсөн ярилцлага цацагджээ. Энэ үеэр тэр Украины талыг яриа хэлэлцээ эхлүүлж, Оросын эзлэн түрэмгийллийн эсрэг тэмцлээ зогсоох санааг цухуйлгасан юм.
“Нөхцөл байдлыг харгалзан үзээд ард түмнээ бодож, цагаан туг өргөх, хэлэлцээний ширээний ард суух зүрх зоригтой хүмүүс хамгийн хүчтэй нь гэдэгт би итгэдэг” гэж пап Франциск ярьжээ.
Ням гарагт Украины эрх баригчид Папын уриалгыг эрс эсэргүүцэж, Оросын түрэмгийлэгчдэд бууж өгөхгүйгээ амласан байна.
“Манай далбааны өнгө шар болон цэнхэр. Бид энэ далбаан дор амьдарч, үхэж, ялдаг. Бид өөр ямар ч далбаа өргөхгүй” гэж Украины гадаад хэргийн сайд Дмитро Кулеба мэдэгджээ.
Тэр бас дэлхийн хоёрдугаар дайны үед Католик сүм хийдийнхэн Германы Нацистуудтай хамтарч байсныг энэ үеэр дурссан байна.
“Цагаан тугийн талаар хөндсөн дээр сануулахад бид 20 дугаар зууны эхний хагаст Ватиканы баримталж байсан стратегийг сайн мэднэ” гэж Кулеба анхааруулаад “өнгөрсөн үеийн алдаагаа давтахгүй байх”-ыг католик сүм хийдийн тэргүүнд уриалжээ.
Ватиканд суугаа Украины элчин сайд Андрей Юраш хэлэлцээ эхлүүлэх Папын санааг Адольф Хитлертэй тохиролцохтой адилтгасан байна.
“Хэрвээ дайныг дуусгахыг хүсвэл Мангасыг устгахын тулд бүхнийг хийх ёстой гэсэн ганцхан түүхэн сургамж бий” гэж тэр сошиал хуудсандаа бичжээ.
Дараа нь Украины ерөнхийлөгч Володимир Зеленский мөн уг маргаанд оролцсон юм.
Тэрбээр загалмайтнууд, муслимууд, иудейчууд гээд бүх шашин шүтлэгтэй украинчууд эх орноо хамгаалан тулалдаж байгааг энэ үеэр онцолсон байна.
“Сүм хийд хүмүүсийн талд байдаг. Харин 2.5 мянган километрийн цаанаас амьд үлдэхийн төлөө тэмцэж байгаа болон тэднийг устгахыг хүсэж байгаа хүчний хооронд зуучилж суудаг газрыг хэлдэггүй юм” гэж Зеленский шүүмжилжээ.
Өрнөдийн дипломатчид бас Папын ярьсан зүйлийг шүүмжилцгээсэн байна.
Тухайлбал Ватиканд суугаа Германы элчин сайд Бернхард Коч “Орос бол олон улсын хууль дүрмийг зөрчсөн эзлэн түрэмгийлэгч! Тиймээс Герман улс дайнаа зогсоохыг Киевээс биш, Москвагаас шаардаж байна” гэж мэдэгджээ.
Хоёр жил гаруйн өмнө эхэлсэн дайны явцад Оросын тал Украины газар нутгийн 20 орчим хувийг эзлээд байгаа юм.
Эх сурвалж: AFP
