Францын ерөнхийлөгч Эммануэл Макрон бусдын тусламжтай амиа егүүтгэх буюу эвтаназийн тухай хуулийн төслийг дэмжиж байгаагаа Ням гарагт мэдэгджээ.

Ингэснээр түүний засгийн газар шинэ хуулийн төслийг тавдугаар сард хэлэлцүүлэхээр парламентад өргөн барихаар болсон байна.

Францын хөрш Швейцар, Бельги, Нидерланд улсууд эдгэршгүй өвчтэй хүмүүсийн эмнэлгийн байгууллагын тусламжтай амиа егүүтгэх эрхийг зөвшөөрсөн хуультай байдаг.

Харин Францын хувьд Католик сүм хийдийнхний эсэргүүцлийн улмаас ийм хуулийг баталж чадалгүй өнөөдрийг хүрсэн юм.

“Liberation” сонинд өгсөн ярилцлагадаа Макрон шинэ хуулийг “эвтаназийн буюу бусдын тусламжтай амиа егүүтгэх” биш, “үхэхэд нь туслах” гэж нэрлэх хүсэлтэй байгаагаа хэлжээ.

“Шулуухан хэлэхэд энэ нь шинэ эрх чөлөөг бий болгож байгаа юм биш. Харин тодорхой хатуу нөхцөл шаардлагын дор үхэхдээ тусламж хүсэх өнөөдрийг хүртэл байгаагүй боломжийг нээж байгаа юм” гэж Макрон ярьсан байна.

Нөхцөл шаардлагыг хангасан өвчтөнүүд эмч нарын тусгай баг нягталж шалгасны үндсэн дээр “үхэх” эрхээ эдлэх боломжтой байх гэнэ.

Гэхдээ хорт хавдрын сүүлчийн шатанд орсон гэх мэт дунд хугацаанд амь нас нь ноцтой эрсдэлд орсон зөвхөн насанд хүрэгчид ийм шийдвэр гаргах эрхтэйг Макрон тайлбарлажээ.

Өвчтөний шийдвэрийг гэр бүлийнх нь гишүүд давж заалдах боломжтой байхаар хуулийн төсөлд тусгасан байна.

Саяхан Франц нь үндсэн хуульдаа хүний үр хөндүүлэх эрхийг тусгасан дэлхийн анхны улс болсон.

Ирэх зургаадугаар сард болох Европын парламентын сонгуулийн өмнө Макрон өөрийгөө нийгмийн шинэчлэгч мэт харагдуулах сонирхлын үндсэн дээр ийм алхмуудыг хийж байна гэж ажиглагчид үзэж байна.

Эх сурвалж: Reuters