Монгол Улсын Ерөнхий сайд Л.Оюун-Эрдэнэ болон Шуурхай штабын гишүүд өнөөдөр “Тавантолгой түлш” ХХК-ийн зүүн бүсийн үйлдвэрт ажиллав.
Энэ үеэрээ тэрээр Ц.Элбэгдорж, П.Цагаан нартай холбоотой шүүхийн шийдвэр гарсан талаар сэтгүүлчийн асуултанд хариулсан юм.
Тодруулбал Ерөнхий Сайд: "Ерөнхийлөгч асан Ц.Элбэгдорж, Худалдаа Хөгжлийн Банкны эзэн "Сахал" Д.Эрдэнэбилэг нар болон тэдний хамаарал бүхий хүмүүст манай шүүх огт хариуцлага тооцдоггүй. "Эрдэнэт" үйлдвэрийн 49 хувийн асуудал гэхэд л шийдэгдэлгүй Улсын дээд шүүх дээр 10 гаруй жил боллоо.
Гашуунсухайт- Ганц мод боомтын хэлцлийг хийхдээ гурав дахь талын төлөөллийг оролцуулахгүй байхаар болж, УИХ-аар эхний баримт бичиг батлагдаад байгаа.
Ер нь бол Ц.Элбэгдоржийн сонирхол Тавантолгойг өөрөө авах байсан. Энэ бол нууц биш.
2013 онд Засгийн газрын төлөөллүүд болох Х.Ганболд, н.Батцэнгэл, н.Энхтүвшин нар БНХАУ-д очиж Монголын тал Тавантолгойг өгье гэдэг санал тавьсан байдаг юм. Энэ ярианы протоколууд бүгд байгаа. Ингээд 2014 онд "Заавал Монгол Улсын тодорхой ААН-үүдийг хувь эзэмшүүлж, оруулна. 51 хувьд нь Монголын ААН-үүд орно, гэхдээ "Эрдэнэс Тавантолгой" компани үүнд хамаарахгүй. БНХАУ-ын тал 49 хувийг өгнө гэдэг хэлцэл дээр мөн, төмөр замыг 49,17,17,17 гэдэг хувиар дөрөв хуваах гэрээнд гарын үсэг зурсан.
2014 оны наймдугаар сарын 21-23- ны хооронд Ерөнхийлөгч асан Ц.Элбэгдорж БНХАУ-ын талтай холбогдох баримт бичигт гарын үсэг зурсан. Өөрөө үүнийгээ хожим нь устгасан.
Би сая БНХАУ-ын Ерөнхий сайд, "Чайна энержи" компанитай уулзах үеэрээ тэр баримт бичгийг сураглаж олж, авч ирсэн. Засгийн газрын гишүүдэд ч танилцуулсан. Эцэст нь Ц.Элбэгдорж тэргүүтнүүд үнэнд гүйцэтгэж Гашуунсухайт- Ганц мод боомтын хэлэлцээр ямар ч маргаангүйгээр батлагдсан.
Түүнчлэн одоо төмөр зам баригдвал Тавантолгойг өөрсдийнхөө өрсөлдөгч гэж үзсэн 2-3 компанийн эрх ашиг зөрчигдөнө. Мөн Баяннуурт байгаа нэр бүхий 11 компанийн хэсэгчилсэн нүүрс тээврийн ажилд саад учирна. Тийм учраас Би БНХАУ-руу уулзалт хийхээр явсан үеэс эхлэн жагсаал цуглаан өрнөсөн.
Энэ бүх жагсаалыг П.Цагаан болон түүний хүү, Дотоодын цэргийн командлагч Р.Чингис болон түүний дүү Р.Саруул нар санхүүжүүлж байгаа.
Ерөнхийлөгч асан Ц.Элбэгдоржийг гадаадад байх үед нь төмөр замын асуудал шийдэгдэх гээд байгаа учраас тун удахгүй Монголд ирж олон нийтийн толгойг эргүүлэх гэж байгаа. Ерөнхий шүүгч Д.Ганзориг эзэндээ үйлчилж эхэлж байна." гэв.
Н.Отгон
