Хурдан морины уралдааны замыг дагуулж хар зам барина гэсэн байж боломгүй шийдвэрийг жирийн ард иргэд болоод зарим эрх баригчид эсэргүүцэж, нэлээд шүүмжилж байгаа харагдана. Эсэргүүцэх нь зөв.
Төрийн албан хаагчдынхаа цалин тэтгэвэрийг нэмж чадахгүй байж, хүүхдийн 20 мянган төгрөгөө 100 хувь ч олгож чадахгүй байж морь дагаж давхидаг том машин хөлөглөсөн “том” дарга сэтэртэнгүүдэд засмал зам тавьж өгч “давраах” хэрэг юу байгаа юм бэ. Яагаад ийм “тэнэг” шийдвэрт дуртай байдаг юм бэ.
Төсвийн болон татвар төлөгчдийн мөнгийг хий хоосон ингэж үр ашиггүй зүйлд үрж зарцуулахын хэрэг юу байгаа юм бэ гэдгийг асуумаар байна. Арай ч дээ нээрээ. Хурдан морины уралдаан дагаж давхидаг том машинуудыг цөөлөх талаар ярих ёстой байтал бүр зам барьж өгнө гэх юм. Үүнийг чинь үнэндээ ойлгох ухаан алга.
Хурдан морины уралдаанд зориулж зам тавьж байхаар Дархан-Улаанбаатарын чиглэлийн замаа засч сайжруул, Баянзүрхийн товчоо-Налайх хүртэл замаа засч сайжруулахаа бодоочээ.
“Монгол наадам цогцолбор” ОНӨТҮГ болон “Монголын морин спорт уяачдын холбоо” хамтран ажиллах санамж бичигт гарын үсэг зуржээ.
Гэхдээ тус газрын удирдлагууд морины уралдаан дагаж давхих машинуудад зориулсан засмал зам барихаар төлөвлөж байгаагаа дуулгаажээ.
Тодруулбал, “Монгол наадам цогцолбор” ОНӨТҮГ-ын дарга Н.Батсүмбэрэл "Бидэнд тулгардаг нэг асуудал нь морины уралдааны үеэр машин явахад их тоос босдог. Энэ асуудлыг харгалзан үзээд уралдааны замын хажуугаар засмал зам барих үүнийг цаашид өөр олон тэмцээн, уралдаан, холын зайн гүйлт зэрэгт ашиглаж болохоор хийх ажлыг төлөвлөж байна.
Хүй долоон худгийг жилийн дөрвөн улирлын ажиллагаатай болгох, аялал жуулчлалын чиглэлд ашиглах зэргээр үйл ажиллагааг нь тэлэх тал дээр ажиллана” гэжээ.
Тулгамдаж байгаа асуудал нь машиныг нь тоос шороо дардаг ч гэх шиг. Тэгвэл хурдан морины нуруун дээр "дарцаглаж" яваа хүүхдүүдийг тоос шороо дардаггүй юмуу. Ийм л юм ярьж байгааг эсэргүүцэх ёстой юм шүү.
О.Сайхан
Оллоо.mn
