Товч агуулга: Дэлхийн хамгийн чинээлэг хүн болох Илон Маск АНУ-ын Ерөнхийлөгч Доналд Трампын хамгийн ойрын холбоотнуудын нэг болсон. Маскийн байр сууриа урьд өмнө нь байгаагүй өндөрлөгт хүргэж чадсан. Тэгтэл "Tesla" компанийн хувьцаа оны эхнээс чөлөөт уналтад ороод байна. "Tesla" АНУ-ын хөрөнгийн бирж дэх аваргуудын нэг. Тус компанийн хувьцааны уналт хөрөнгийн биржийн тогтворгүй байдлыг нэмэгдүүлж магадгүй юм.
“Bloomberg”-ийн тэрбумтнуудын индексээс харвал “Tesla”, “SpaceX” гэх мэт компанийн захирал Илон Маск 336 тэрбум ам.долларын хөрөнгөтэйгөөр тэргүүлж байна. Тэр дэлхийн хамгийн хүчирхэг хүн болох АНУ-ын Ерөнхийлөгч Доналд Трампын хамгийн ойрын холбоотнуудын нэг болсон.
Дотоодын үйлдвэрлэлийг дэмжих байр суурь илэрхийлдгээрээ алдартай Трамп өөрийн шинэ захиргаандаа Засгийн газрын үр ашигтай байдлын алба (DOGE) үүсгэж тэргүүнээр нь Маскийг томилсон байгаа. Тус алба АНУ-ын холбооны засгийн газрын мэдээллүүдэд нэвтэрч, шалгалт хийн олон тэрбум ам.долларыг төсвийг танасан гээд буй.
Маскийн байр суурь урьд өмнө нь байгаагүй хүчирхэг байхад “Tesla” компанийн хувьцаа хэцүүхэн нөхцөл байна. Тэр Ерөнхийлөгч Трампын ойрын хүн болсноор АНУ-ын сонгууль явагдсанаас арванхоёрдугаар сарын сүүл хүртэл “Tesla”-гийн хувьцааны үнэ 91 хувиар нэмэгдсэн. Учир нь хөрөнгө оруулагчид Трампын захиргаа “Tesla” болон “SpaceX”-д ашигтай бодлого хэрэгжүүлнэ гэж таамаглаж байсан юм.
Тэгвэл “Tesla” компанийн хувьцаа арванхоёрдугаар сард нэгж нь 435 ам.доллар хүрч рекорд тогтоосноосоо хойш чөлөөт уналтад ороод буй. Он гарснаас хойш тус компанийн хувьцааны ханш 30 хувиар унаад байгаа. Мягмар гарагийн /2025.03.25/ арилжаа хаагдахад “Tesla” таван арилжаа дараалж өсөлт үзүүлсэн. Ингэж сэргэлт үзүүлж эхлэхэд Трамп АНУ-д орж ирдэг автомашины импортод 25 хувийн татвар тавина гэж мэдэгдсэн нь тус компанийн хувьцаа лхагва гарагт /2025.03.26/ зургаа гаруй хувиар унахад хүргэв.
Зургийн эх сурвалж: Planet Updates Hub
“Tesla”-гийн хувьцаа яагаад унаж байна вэ
Олон улсын эдийн засаг, худалдааны бодлогын мэргэжилтэн Роберт Скотт хэлэхдээ “Tesla”-гийн хувьцаа хэт өндөр үнэлгээтэй байгаа тул унах нь зайлшгүй гэжээ. Скотт “AlJazeera” агентлагт хэлэхдээ “Tesla-гийн хувьцааны үнэлгээ хэт өндөр байсан. Түүхэнд бүртгэгдсэн хамгийн өндөр үнэлгээ, ашгийн харьцаатай компаниудын нэг. Энэ нь хувьцааны үнэ компанийн олж буй ашигтай харьцуулахад маш өндөр байсан гэсэн үг. Зах зээлийн суурь хүчин зүйлстэй харьцуулахад хувьцааны үнэ хөөрөгдсөн байсныг илтгэнэ” хэмээсэн юм.
“Macrotrends” сайтаас харвал “Tesla” компанийн үнэлгээ орлогоосоо 161 дахин их байна. Энэ нь “Ford”, “General Motors”, “Toyota” гэх мэт бусад компанийн үнэлгээ, орлогын харьцаанаас хавьгүй өндөр үзүүлэлт. Үүнээс харвал хувьцаа эзэмшигчид нь тус компанийг технологийн дэвшил, хурдацтай өсөлт үзүүлнэ гэж итгэж найдсаар байгаа бололтой.
“Redspy” автомашины салбарт зөвлөгөө өгдөг компанийн ажилтан Жей Нагли “Tesla-г цахилгаан машины салбарт ноёрхох компани эсвэл робот такси болон өөрийгөө жолооддог машины салбарыг ноёрхоно гэж хөрөнгө оруулагчид нь үнэлж байгаа. Гэвч БНХАУ-ын үйлдвэрлэгчдийн хүчин чадлыг харвал Tesla цахилгаан машины салбарт ноёрхохгүй гэдэг нь илт байна” гэжээ.
Милкен хүрээлэнгийн ахлах эдийн засагч Уильям Ли “Tesla”-гийн хувьцааны үнэ унаж байгаа нь тус компани шинэ бүтээгдэхүүнээ хойшлуулсаар байгаатай холбоотой гэж тайлбарласан юм. Тэр “Model Y загварын шинэчлэл хойшлогдсоор байгаа, хамгийн чухал нь тэд ямар ч шинэ загвар танилцуулаагүй” хэмээсэн байна.
Ли “Хөрөнгө оруулагчид өөрийгөө жолооддог машины технологид ахиц дэвшил гарахыг хүлээж байгаа. Энэ дэвшил гаралгүй цаг хугацаа өнгөрсөөр, роботын хөгжүүлэлтийнх нь сэтгэл дундуур үзүүлэлт хөрөнгө оруулагчдын урмыг хугалж байна” гэж хэлжээ. Шинэ загвар, технологийн томоохон дэвшилгүйгээр “Tesla”-д салбарынхаа тэргүүлэгч гэх байр сууриа хадгалахад хэцүүхэн болж байна гэж тэр хэлсэн юм.
Маскийн улс төрийн оролцоо хөрөнгө оруулагчдын санааг зовоож байгаа талаар Ли онцолсон байна. Тэр “Маск АНУ-ын засгийн үйл хэрэгт идэвхтэй оролцож буй нь түүний компаниудаа удирдан, амласан инновацуудаа цаг хугацаанд нь хэрэгжүүлэх чадварт нь саад болж байна гэж хөрөнгө оруулагчид үзэж байна” хэмээжээ.
Маскийн улс төрийн үйл ажиллагаа АНУ-д зарим хүний дургүйцлийг хүргэж байгаа. Үүнийг нь хүмүүс эсэргүүцэн жагсаж, зарим тохиолдолд “Tesla”-гийн дилер, үйлдвэрүүд болон цэнэглэх станцуудыг шатаасан тохиолдол гарсан. Европ даяар, тэр дундаа Германд ч гэсэн “Tesla”-гийн машинууд руу халдах тохиолдлууд ихсэж, олон машины дугуйг хагалсан хэрэг бүртгэгдсэн. Энэ нь шинээр “Tesla” авахаар төлөвлөж байсан хүмүүсийг харзнахад хүргэж буй. Тодруулбал хоёрдугаар сард “Tesla”-гийн Европ дахь борлуулалт өнгөрсөн оны мөн үеэс 40 хувиар буурсан байна.
Зургийн эх сурвалж; Financial Times
Маскийн “DOGE”-той холбоотой үйл ажиллагаа түүнийг бүр ч их эсэргүүцэлтэй нүүр тулгаруулахад хүргэж магадгүй гэж шинжээчид үзэж буй. “DOGE” холбооны засгийн газрын төсвийг танах, хэдэн мянган ажлын байрыг цомхотгох алхмууд нь “эдийн засгийг хямрал руу ойртуулна. Хямрал нь Тесла шиг өндөр хөшүүрэгтэй хувьцаанд онцгой хүчтэй нөлөөлнө” гэж Скотт хэлжээ.
Эдийн засгийн нөлөө
“Tesla” нь АНУ-ын хөрөнгийн зах зээл дахь аваргуудын нэг тул хувьцааны уналт нь зах зээлийн савлагааг нэмэгдүүлж болзошгүй. Энэ нь хөрөнгө оруулагчдыг өндөр өсөлттэй, технологийн чиглэлийн хувьцаануудад болгоомжтой хандахад хүргэж магадгүй юм. Тус компанийн хувьцааны огцом уналт нь хөрөнгө оруулагчдад технологи, цахилгаан автомашины (EV) салбарын үнэлгээ хэт хөөрөгдсөн гэсэн дохиог өгч болзошгүй.
Үүний улмаас хөрөнгө оруулалтын капиталаа урсгах чиглэл өөрчлөгдөж, зөвхөн “Tesla” төдийгүй бусад технологийн компаниудын хөрөнгө босгох чадварт сөргөөр нөлөөлөх боломжтой. Энэ нь АНУ-ын эдийн засгийн өсөлтөд шууд нөлөөлөхгүй ч технологийн дэвшил, шинэчлэлтийг удаашруулах эрсдэлтэй. Гэхдээ АНУ-ын эдийн засаг төрөлжсөн тул “Tesla”-ийн уналт томоохон хямрал үүсгэх магадлал бага.
Эх сурвалж: Al Jazeera, CNN, MacroTrends, Trading View
Энэ мэдээнд өгөх таны үнэлгээ
