Нийгэм эдийн засгийн чамгүй хүнд үед шинээр байгуулагдсан Ж.Эрдэнэбатын Засгийн газар арай гэж жигдэртэл Ерөнхийлөгчийн сонгуульд намынх нь дарга нэр дэвшихээр болж чимээгүйхэн бэлтгэл ажилдаа орсон. Өнгөрөгч 2017 оны босго давсан даруй Ерөнхийлөгчийн сонгуулийн компанит ажиллагаа бүр ил өрнөөд эрх баригч намынхан ямар ч ажил хийгээгүй гэхэд болно. Ийнхүү Ерөнхийлөгчийн сонгуульд тугаа бөхийлгөсөн эрх баригч намынхан мөн хоёр талцан үзэлцсээр намрын хяруу унагаад өвлийн сартай золгосон. Намын Их хурлаас баталгаажсан Ерөнхий сайд У.Хүрэлсүх ажлыг гялалзуулаад өгнө хэмээсэн ч одоогийн байдлаар ураг төрлийн нутаг нугын гэмээр томилгоо төдийхөн хийж сууна. Тухайлбал, Засгийн газрын ээлжит хуралдаанаар Ашигт малтмал газрын тосны газрын дарга Д.Баатарцогтыг үүрэгт ажлаас нь чөлөөлж, Х.Хэрлэнг тус албан тушаалд томилсон байна. Х.Хэрлэн нь 1967 онд Хэнтий аймгийн Өндөрхаан хотод төрсөн, Ерөнхий сайд У.Хүрэлсүхтэй нэг нутгийнхан аж. Үүнээс харвал У.Хүрэлсүхийг МАН-ын Бага хурал, Их хурлаар ил далд дэмжсэн нөхдийн цуваа, тэдний томилгоо лав энэ өвлийн сарыг барж таарна. Нөгөө талаас нутаг нуга найз нөхдийн томилгоо ч бас байгаа гэхээр эрх баригч намынхан 2020 оны сонгуулийн кампанит ажилтайгаа золготол юу ч хийхгүй бололтой.
Х.Баатар
Шуурхай.мн