Японы шүүх Хирошимагийн атомын бөмбөгийн дэлбэрэлтээс амьд үлдэж, дараа нь гадаадад нүүж суурьшсан хүмүүсийн ар гэрт эмчилгээний зардлын нөхөн олговор олгох ёстой гэж засгийн газарт үүрэг болголоо. Атомын бөмбөгийн дэлбэрэлтээс амьд үлдсэн хүмүүсийг хибакүша гэж нэрлэдэг. Японы хуулиар тэдний эмчилгээний зардлыг төрөөс даах ёстой байдаг.

Гэвч 1974 онд Японы засгийн газар гадаадад амьдарч буй хибакүшад эмчилгээний тэтгэмж олгохгүй гэсэн шийдвэр гаргасан байна. Энэ шийдвэрийг 2003 онд хүчингүй болгосон. Үүнээс хойш гадаадад амьдарч байсан, нас барсан хибакүшагийн ар гэрийнхэн Японд амьдарч буй хибакүшатай адил эрхтэй гэж үзэн шүүхэд нэхэмжлэл гаргасаар иржээ. Энэ удаагийн хэрэгт Хирошимад атомын бөмбөгт өртөөд, дайны дараа Солонгосын хойгт нүүж суурьшсан Өмнөд Солонгосын гурван хибакүшагийн ар гэр 2023, 2024 онд нэхэмжлэл гаргасан байна. Тэд нийт 21,600 ам.доллар нэхэмжилжээ. Гэвч засгийн газар 2003 оноос хойш 20 гаруй жил өнгөрсөн тул нөхөн олговор нэхэмжлэх хугацаа дууссан гэж мэдэгдсэн байна.

Хирошимагийн дүүргийн шүүх энэ тайлбарыг хүлээн зөвшөөрсөнгүй. Шүүх засгийн газрын энэ байр суурийг эрх мэдлээ буруугаар ашигласан үйлдэл гэж үзсэн байна. Шүүгчийн хэлснээр, засгийн газар өөр хэргүүдээр уг шийдвэрийн хууль ёсны байдлыг маргаж байсан тул хар гэрийнхэн өмнө нь нөхөн олговор нэхэмжлэхэд хүндрэлтэй байсан аж. Мөн 2007 онд Японы Дээд шүүх засгийн газрыг гадаадад амьдарч буй хибакүшад тэтгэмж олгоогүй нь хууль зөрчсөн гэж шийдвэрлэсэн гэдгийг дурдсан байна.

Иймээс шүүх нөхөн олговор нэхэмжлэх эрх хугацаагаар хязгаарлагдаагүй гэж үзэж, засгийн газрыг хүссэн бүх мөнгийг төлөхийг үүрэг болголоо. Хохирогчдын өмгөөлөгчдийн хэлснээр, энэ нь гадаадад амьдарч байсан хибакүшагийн нөхөн олговор нэхэмжлэх хугацааны талаар шүүх анх удаа шийдвэр гаргасан тохиолдол болж байна.