Монголын Ардчилсан Холбооны анхны Ерөнхий Зохицуулагч С.Зориг агсны хөшөөнд АН-ын төлөөллүүд цэцэг өргөж, хүндэтгэл илэрхийллээ.
Цэцэг өргөсний дараа АН-ын ЕНБДарга С.Баярцогт сэтгүүлчдийн асуултад хариулахдаа: "Миний хувьд С.Зориг агсантай олон зүйлээр холбоотой. Анх Москвагийн их сургуулийн нэгдүгээр курсын оюутан болж очиход С.Зориг агсан тавдугаар курсийн ах байсан.
Бидний үлгэр дуурайлал болсон гол хүн байлаа. Дараа нь ардчилсан хөдөлгөөний үйл явцад хамт оролцоод Ардчилсан Үндсэн хуулийг хамтарч баталсан. Үргэлжлүүлээд УИХ-д хамт сонгогдоод С.Зоригийн фракцыг байгуулахад би нэг гишүүн нь байсан.
Дээрээс нь Ц.Элбэгдоржийн Засгийн газар байгуулагдахад С.Зориг агсан Дэд бүтцийн сайд, би Байгаль орчны сайдаар хамт ажиллаж байлаа. Мөн УИХ дахь Монгол-Японы парламентын бүлэгт хамт байсан. С.Зориг тэр үеийн залуучуудын үлгэр жишээ байсан. Бид хоёрын хувьд их онцгой харьцаатай байсан. Намайг ерөөсөө нэрээр дууддаггүй, кохай гэж дууддаг байсан. Тэр нь Японоор доод ангийн дүү гэсэн үг.
Өөрийгөө сэнсэй сэнпай гэж дуудаж байгаарай гэдэг байсан. Ордны коридорт тааралдаад, "Юу байна? Кохай" гэж дууддаг байсан.
Маш их олон төрлийн авьяастай, маш их уншдаг, боддог, үзэл санааг маш сайн илэрхийлдэг хүн байлаа. Оюутан байхдаа цуг сагс их тоглодог байсан. Тэгэхэд заалны нэг талаас нөгөө тал хүртэл гар дээрээ алхдаг байв. Бас цуг байхдаа бүх хүмүүсийн нэрийг Орос руу орчуулж дууддаг байсан. Тухайн үед зургийн аппараттай байсан, бидний залуугийн бүхий л зургийг энэ аппаратаар авсан байдаг.
Энэ хүний үхлээр улс төр хийдэг нь Монголын улс төрийн эмгэнэл болсон. 2000 оноос хойш 2024 он хүртэл энэ хүний үхлээр сонгуулийн улс төр хийдэг нь нийт Монголчууд ялагдсан үр дүнд хүргэсэн.
Энэ хүний үйл хэргийг үеийн үед үргэлжлүүлэх ёстой. Хэрэг гараад олон жил болсон, ажлын хэсгүүд солигдоод байгаа нь хэргийн ул мөр их бүдгэрсэн гэж би боддог. Орчин үед бүх зүйл сайжирсан учраас олон жилийн өмнөх хэргүүд илрэх болсон. Иймээс ч энэ хэрэг удахгүй илрэнэ гэдэгт би итгэлтэй байгаа" гэв.
М.Чой
