“Oxford Economics”-ийн 2026 оны “Global Cities Index”-т Монгол Улсын нийслэл Улаанбаатар хот дэлхийн томоохон 1000 хотоос 426 дугаарт эрэмбэлэгдлээ. Тус индексэд дэлхийн хотуудыг эдийн засгийн тамир тэнхээ, хүмүүн капитал, амьдралын чанар, байгаль орчин, засаглал гэсэн таван бүлгээр үнэлж, эрэмбэлдэг. Ингэхдээ эдийн засгийн үзүүлэлт 30 хувь, хүмүүн капитал болон амьдралын чанар тус бүр 25 хувь, байгаль орчин, засаглал тус бүр 10 хувиар жигнэж оноог тооцоолсон байна. Улаанбаатар хот хүмүүн капиталаар 169 дүгээр байрт орсон нь хамгийн сайн үзүүлэлт болжээ. Энэ ангилалд хүн амын бүтэц, боловсролын түвшин, их сургуулиуд, бизнесийн орчин зэрэг үзүүлэлтийг хамруулсан байна. Харин эдийн засгаар 443 дугаарт, засаглалаар 365 дугаарт, амьдралын чанараар 677 дугаарт, байгаль орчноор 765 дугаарт эрэмбэлэгдсэн байна. “Oxford Economics” мөн Улаанбаатарыг улсынхаа дунджаас илүү хурдтай хөгжиж, бүтээмж болон нэг хүнд ногдох орлогоор ахиц гаргаж буй “Emerging Standout” буюу "Онцлох хөгжиж буй хотууд"-ын жагсаалтад багтаажээ. Ерөнхий эрэмбийг Нью-Йорк, Лондон, Парис хот тэргүүлсэн бол эхний 10-т Сиэтл, СанФранциско, Дублин, Бостон, Сан-Хосе, Токио болон Цюрих хот багтсан байна.