Сүүлийн үед БНН-ын дарга Б.Жаргалсайханы фэйсбуук дэх цахим хуудас ихээхэн идэвхтэй байгаа билээ. Улс оронд болж буй тулгамдсан асуудлаар санал бодлоо илэрхийлсэн нийтлэлүүд ч гарах болсон. Тэгвэл түүний хуудсанд Абсолют дэлгүүрийн ажилтнууд бүтээгдэхүүндээ хордсон болон тус газрын сэжиг бүхий зарим баримтуудын талаар ингэж бичжээ.
"Абсолют" хэмээх сүлжээ дэлгүүр Монгол Улсад нээгдсэн өдрөө л Буриадад олдог бүтэн жилийн ашгаа "хураасан" гэдэг. Монголчууд орос бараанд элэгтэй байдаг учраас "Абсолют" олон сүлжээ дэлгүүр өргөжиж байна.
Гэхдээ монголчуудын хүсэн хүлээсэн чанартай бараа бүтээгдэхүүнээр үйлчилж чадаж байна уу гэсэн асуулт бий. Яг өнөөдрийн байлаар Долоон буудалд байрлалтай "Абсолют" дэлгүүрийн 7-10 ажилтан бүтээгдэхүүнээсээ хордоод үхлүүт байна. Энэ тухайгаа маш өндөр түвшинд нууцлаж, ажилтнуудаа дарамтлаж байгаа гэсэн мэдээлэл байгаа юм. Урт хугацааны тээвэрлэлтээс үүдэн мөөгөнцөртсөн, өмхийрсөн бараа бүтээгдэхүүн гарсан талаар өмнө нь мэдээллэгдэж байсан билээ.
Улаан-Үдийн Хотын зөвлөлийн гишүүн, бизнесмэн Индира Шагдаровагийн "Абсолют" хаанаасаа бараагаа татдаг вэ. Буриадын хэвлэлд БНХАУ-д шаардлага хангаагүй үйлдвэр худалдан аваад, тэндээс бараагаа татдаг гэсэн мэдээлэл тавигдсан. Эрхүү хотод салбар дэлгүүрийг нь нээхийг зөвшөөрөөгүй байдаг юм. Тэгэхээр Хятадад үйлдвэрлэсэн бараа бүтээгдэхүүнийг Улаан-Үдэд аваачин шошгожуулсан байж болох уу. Энэ сэжиг таамгийг Мэргэжлийн хяналтын байгууллага шалгасан уу. Хоёрдугаарт ОХУ-д хугацаа нь дууссан бараа бүтээгдэхүүнийг хямдаар худалдан авч шошгийг нь өөрчлөн Монгол руу оруулж ирсэн байж болох уу.
ОХУ-д хүнсний бараа асар үнэтэйг монголчууд мэднэ. Худалдааны хоригоос өмнө ч тийм байсан билээ. Гэтэл яагаад "Абсолют" гэдэг дэлгүүр хямд бүтээгдэхүүн оруулж ирээд байгааг бодож үзсэн үү. Үүнд ямар учир байгаа юм биш үү.
Хуулийн байгууллагын нэр бүхий ажилтнуудын хамгаалалт дор байдаг "Абсолют" дэлгүүр иргэдийн амжиргаагаа залгуулдаг олон жижиг дэлгүүрүүдийн үүдийг бариулан нээгдсэн. Тэр нээгдсэн шигээ чанартай бүтээгдэхүүн зарахгүй байгааг шалгах газар олдохгүй байгаа талаар иргэд яриад байна шүү дээ. Дотоодын зах зээлээ хамгаалах энэ тэрээ байг гэхэд хуурамч, хулхи барааг нь шалгаад шахаад байх хэрэгтэй биз дээ. Монголчууд дэлгүүр ажилуулж чадна ш дээ.
