У.Хүрэлсүхийн Засгийн газар “баартай” байна. Гурван сайд нь АТГ-т ээрэгдэж, нэг яам нь үндсэндээ эзэнгүйдлээ. Хэдийгээр Зам, тээврийн хөгжлийн сайдын үүргийг Шадар сайд Ө.Энхтүвшинд давхар хариуцуулсан ч энэ нь өөрөө хууль зүйн маргаан дагуулсан сэдэв болчихлоо. Сайдыг УИХ-аас томилж, чөлөөлдөг. Гэтэл парламентын энэхүү онцгой бүрэн эрхэнд Засгийн газар халдсан байж болзошгүй нөхцөл байдал үүсэв. Огцрох өргөдлөө өөрөө өгч, Засгийн газраар чөлөөлөгдөх шийдвэр гаргуулсан Ж.Бат-Эрдэнэ хүртэл “Би одоохондоо сайд хэвээрээ шүү” гэсэн өнгө аястай ярилцлага өгсөн нь өчигдөр олон нийтэд хүрээд байна. Үнэхээр тэр бол хууль ёсны сайд. УИХ-аас чөлөөлөгдөх хүртлээ тэрээр Зам, тээврийн хөгжлийн сайд гэдэг нь маргашгүй үнэн биз ээ.
Өөх ч биш, булчирхай ч биш байдалтай болсон Зам, тээврийн хөгжлийн яам тойрсон асуудлыг нэг тийш хагалах субъект нь гагцхүү УИХ билээ. Ирэх намрын чуулган нээмэгц энэ асуудал УИХ-аар хэлэлцэгдэж, Ж.Бат-Эрдэнэ сайдыг чөлөөлөх болов уу. Харамсалтай нь, чоно борооноор гэдэгчлэн сайдын суудал сулрах сургаар л МАН дахь гуравдугаар ээлжийнхэн “хоолонд” орохоор бэлджээ. Энэ салбарт томилогдох магадлалтай хүмүүсийн нэрс хэвлэлээр хөвөрч, хэд хэдэн хүн “Би сайд болохгүй” гэж мэдэгдсэн нь өөрөө асуудал хэрхэн хурцадсаны илрэл. Хэвлэлээр нэр нь гарч, хэтэрхий эрт гэрэлд цохигдчихсон нэр дэвшигчдээс илүүтэй энэ салбарт ажилласан туршлагатай, ОХУ, БНХАУ гээд хоёр том хөршийн дунд зам, тээврийн салбарын бодлогыг зангиадаад явчих зангарагтай, мэргэжлийн хүн энэ засагт хэрэгтэйсэн. Гэвч горилогчид нь нэгнээ гэрэлд цохиулж, Засгийн газар нь ч томилгоондоо анхаарахгүй байсаар ээлжит чуулгантай золгож мэдэх нь. Юу гэвэл, Засгийн газрын хуралдаанаар сүүлийн үед хийгдсэн томилгоо болгон сонгуулийн өр төлсөн, хоёр, гуравдугаар ээлжийнхнийг хоолонд оруулсан маягтай явж байгаа нь маргашгүй үнэн юм. Төрийн хэд хэдэн томоохон албан тушаал ийм зарчмаар явсны нэг нь л гэхэд Зам, тээврийн хөгжлийн дэд сайд Б.Цогтгэрэлийн оронд Л.Халтарыг томилсон Засгийн газрын шийдвэр.Төмөр замд осол гарч, вагон унасан хэрэгт Б.Цогтгэрэл хариуцлага хүлээж л байгаа бол “Улаанбаатар төмөр зам” хувь нийлүүлсэн нийгэмлэгийн Тээвэрлэлт, хөдөлгөөн хариуцсан орлогч дарга Л.Халтар дэд сайд болж дэвших бус, ажлын хариуцлага хүлээж огцрох ёстой байсан бус уу.
Зам, тээврийн хөгжлийн дараагийн сайд хэн болох талаар таамагтаа эргээд ороход энэ бол У.Хүрэлсүхийн Засгийн газар байгуулагдах үед 33:32-оор талцсан МАН-ын “цөөнхийн бүлэг”-ийн квот. Гэвч өнгөн дээрээ 32-ынхон Ж.Бат-Эрдэнийг Зам, тээврийн хөгжлийн сайдад нэр дэвшүүлсэн юм шиг үзэгдэх боловч үнэндээ цаана нь томоохон хувь улстөрчийн эрх ашиг байсан гэх хардлага байдаг. Тэгэхээр энэ удаад ч бас Ж.Бат-Эрдэнийн орны сайдыг У.Хүрэлсүхээс илүүтэй квот эзэмшигч томилуулах болов уу. Өгсөн нэрийг нь УИХ-д оруулж батлуулах үүрэг л Ерөнхий сайдад ногдож мэдэх юм. Нэгэнтээ МАН-ын хашир бурхи Ц.Нямдорж Монгол Улсын 28 дахь Ерөнхий сайдаар Ч.Сайханбилэгийг томилуулахаар УИХ-д оруулж ирэхэд “Том биетэй л болохоос Алтанхуяг байна шд” гэж шазуур зууж хэлж байсан юмдаг. Энэ бол огцорсон Ерөнхий сайд Н.Алтанхуягийн бодлого өөрчлөгдөхгүй, түүний хүн л дахин засгийн бодлогыг тодорхойлох нь гэж ундууцсан хэрэг. Тэгвэл одоо Зам, тээврийн хөгжлийн дараагийн сайд ч бас “Сахалгүй л болохоос Бат-Эрдэнэ” байх магадлал өндөр байгаа юм. Яагаад гэвэл энэ квот эзэнтэй!
eagle.mn
