АН-ын хоёр, МАН нэг буюу өмнөх гурван ч Засгийн газар дэмжээгүй гэх “Майдар хот” төслийг У.Хүрэлсүхийн танхим дэмжиж 12 мянган га газар олгож улсын тусгай хэрэгцээнд авах шийдвэр гаргалаа. Энэ талаар олон нийт болон нийгмийн сүлжээнд өрнөж буй зарим эргэлзээ, асуулт, мөн тайлбарыг нэгтгэн хүргэе.

УИХ-ын гишүүн асан, хуульч Ж.Сүхбаатар “Хот байгуулалтын талаарх төрийн бодлогыг УИХ тодорхойлж шийддэг” гэж жиргэжээ. Түүнийхээр бол УИХ-ын энэ онцгой бүрэн эрхэнд Засгийн газар халдсан мэт. Гэтэл тиймгүй бөгөөд энэ талаар Сангийн сайд Ч.Хүрэлбаатар “Майдар төсөл бол хувийн хэвшлийнхний хэрэгжүүлэх төсөл. Хувийн хэвшлийн төсөл учраас санхүүжилтээ хэрхэн босгодог вэ, яг л тэр зарчмаар явна. Засгийн газрын баталгаа ч юм уу, Засгийн газраас ямар нэгэн байдлаар дэмжих зүйл байхгүй” гэж тайлбар өглөө. Тэгвэл хувийн хэвшлийн хэрэгжүүлэх төслийн газрыг улсын тусгай хэрэгцээнд авч болох уу, тийм хууль бий юү. Үүнд Сангийн сайд Ч.Хүрэлбаатар “Миний ойлгож байгаагаар Газрын тухай хуульд үндэсний хэмжээний томоохон бүтээн байгуулалтын газрыг Засгийн газар тусгай хэрэгцээнд авна гэж заасан. Үндэсний хэмжээний томоохон төсөл гэдэг дээр Ерөнхийлөгчийн зарлиг хүртэл гарсан” гэж хариулав.

Харин улсын тусгай хэрэгцээнд авсан уг 12 мянган га газарт одоогоор айл өрх, аж нэгжүүд зөвшөөрөлтэй эсэх, тэдэнд нөхөн төлбөр олгох уу? Хэрвээ олгох бол газрыг нь улсын тусгай хэрэгцээнд авсан Засгийн газар төсвөөс олгох уу, төсөл хэрэгжүүлэх хувийн хэвшил олгох уу. Энэ талаар Барилга, хот байгуулалтын сайд Х.Баделхантай ярилцаж тодрууллаа.

-Майдар хот байгуулах 12 мянган га газрыг улсын тусгай хэрэгцээнд авахаар Засгийн газраас шийдлээ. Энэ төслийг Засгийн газар хэрэгжүүлэх юм уу, хувийн хэвшил хэрэгжүүлэх юм уу?

-“Майдар хот” төслийг Герман улсын архитекторууд хийсэн юм билээ. Германдаа бол нэлээд өндөр хэмжээнд шалгарсан зураг төсөл гэсэн. “Майдар хот” төслийнхөн эхлээд 27 мянган га газар шаардлагатай гэж санал ирүүлсэн. Бид саналыг судлаад, мөн орон нутгийн ИТХ-аас санал аваад нийтдээ 12 мянган га газрыг зөвшөөрч болно гэж үзсэн. Орон нутаг ч 12 мянган га газрыг зөвшөөрсөн. Төслөө хэзээ хэрхэн,  яаж хэрэгжүүлэхийг хувийн хэвшлийнхэн өөрсдөө мэднэ. Засгийн газар бол зөвхөн газрын асуудлыг л шийдэж өгсөн.

-Энэ 12 мянган га газарт одоо хэдэн айл, аж ахуйн нэгж байгаа вэ. Тэдгээрийг хаашаа нүүлгэх вэ?

-Энэ газарт одоогоор  208 аж ахуйн нэгж зөвшөөрөл авсан байна. Үүний 180 гаруй зөвшөөрлийг 2013-2015 онд өгсөн юм байна. Яагаад ингэж олноор өгсөн гэхээр “Майдар төсөл” гэж том төсөл хэрэгжүүлнэ гэдэг сургаар сум, орон нутгаас олон  зөвшөөрөл олгож тараачихсан юм билээ.

-Тусгай хэрэгцээнд авсан  12 мянган га газарт байгаа аж ахуйн нэгж, айл өрхүүдийг нүүлгэхийн тулд тэдэнд нөхөн төлбөр олгох уу?

-Бүх асуудлаа төсөл хэрэгжүүлж байгаа компани нь шийднэ. Түүнээс биш, Засгийн газар төсөлд болон нөхөн төлбөрт төсвөөс нэг ч төгрөг өгөхгүй. Төсөл хэрэгжүүлж байгаа компани нь аж ахуйн нэгжүүдтэйгээ гэрээ ч юм уу хийгээд, ямар нэгэн байдлаар тохиролцоод ажиллах байх.

itoim.mn