Засгийн тогтвортой байдал, төрийн албаны хуулийг яг таг мөрдөж ажиллана хэмээсэн У.Хүрэлсүхийн Засгийн газар хэлсэн амлалтаасаа ухарч, ээлжит томилгоонуудыг хийсээр байна. Эх сурвалжийн хэлж байгаагаар хэд хэдэн агентлаг газрын дарга нарыг солих тухай яригдаж байна.
Засгийн газар байгуулагдсаныхаа дараахан буюу өнгөрсөн аравдугаар сард Цагдаагийн ерөнхий газрын дарга, хурандаа Ө.Энхтөрийг ажлаас нь чөлөөлж, түүний оронд Хууль сахиулахын их сургуулийн захирал, профессор, тэргүүн комиссар С.Баатаржавыг томилсон. Хурандаа Ө.Энхтөрийг харин С.Баатаржавын оронд Хууль, сахиулахын их сургуулийн захирлаар шилжүүлсэн.
Цагдаагийн байгууллагаас эхэлсэн Засгийн томилгоо удалгүй Тагнуулын байгууллага руу шилжиж, арваннэгдүгээр сарын 1-нд Тагнуулын ерөнхий газрын дарга Б.Хурцыг чөлөөлж, түүний оронд Д.Гэрэлийг томилсон билээ. Үүний дараа төрийн нарийн бичгийн дарга нарыг сэлгэсэн. Сангийн яамны төрийн нарийн бичгийн дарга Б.Нямаа, БСШУЯ-ны Төрийн бичгийн дарга Ж.Болормаа нарыг ажлаас нь чөлөөлсөн.
Үүний шилийг дарж Ашигт малтмал газрын тосны газрын дарга Д.Баатарцогтыг ажлаас нь чөлөөлж, Х.Хэрлэнг тус албан тушаалд томилсон билээ. Харин одоо зарим агентлаг газрын дарга нарыг чөлөөлөх асуудлыг Засгийн газрын хуралдаанаар удахгүй оруулахаар төлөвлөснийг эх сурвалж хэллээ.
Х.Баатар
Шуурхай.мн