УИХ дахь МАН-ын бүлгийн өчигдрийн хуралдаанаар хоёр асуудал хэлэлцэн шийдвэрлэсэн талаар Бүлгийн дарга Д.Хаянхярваа, ажлын албаны дарга Н.Энхтайван нар сэтгүүлчдэд мэдээлэл өглөө.
УИХ-д өргөн мэдүүлсэн болон хэлэлцүүлгийн шатанд байгаа хууль, УИХ-ын бусад шийдвэрийн төслийн талаар УИХ-ын гишүүдээс гаргасан саналд үндэслэж, цаашид хэрхэн ажиллах зарчмаа бүлгийн хуралдаанаар тогтсон байна. Мөн Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуульд нэмэлт өөрчлөлт оруулах тухай хуулийн төслийн талаар санаа оноогоо хуваалцаж, энэ хуулийг хэлэлцэж батлах нь зүйтэй гэсэн шийдвэрт хүрчээ. Хуралдаанаар хэлэлцсэн эхний асуудлаар бүлгийн дарга Д.Хаянхярваа “УИХ-д өргөн мэдүүлсэн нэлээд хууль байна. Тиймээс эдгээр хуульд Байнгын хороогоор дамжуулж, МАН, АН-ын бүлгийн гишүүдээс санал авсан. Цаашдаа ямар хуулийн төслийг санаачлагчид нь буцаах, алийг нь эхний ээлжид хэлэлцэх, эсвэл намрын чуулганд шилжүүлэх вэ гэдэгт зарчмын хувьд тохиролцсон” гэлээ
. Хууль тогтоомжийг хэрэгжүүлэх тухай журмын хүрээнд хэлэлцэх нэлээд хэдэн хууль байгаа бөгөөд УИХ-д өргөн мэдүүлсэн хуулийг хэлэлцүүлгийн шатанд байгаа хуультай хэрхэн уялдуулж авч үзэх вэ гэдгийг Бүлгийн дэд дарга Я.Содбаатар, Ажлын албаны дарга Н.Энхтайванаар ахлуулсан ажлын хэсгийнхэн судлахаар болжээ.
Мөн Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуульд нэмэлт өөрчлөлт оруулах тухай хуулийн төслийн судалгаа тооцоог хийж, энэ онд багтааж батлахаар ярилцсан байна. Энэхүү нэмэлт өөрчлөлтийг баталж 2019 оны төсөвт хөрөнгө мөнгийг нь суулгаж улмаар 2019, 2020 он гэхэд улс төрийн хэрэгт хэлмэгдэгсдийн асуудлыг шийдвэрлэж дуусгахаар төлөвлөжээ. Энэхүү мэдээллийн дараа бүлгийн дарга Д.Хаянхярваа сэтгүүлчдийн асуултад хариуллаа.
-Сонгуулийн тухай хууль, Улс төрийн намуудын тухай хуульд өөрчлөлт оруулах гэж байгаа гэсэн. Зарчмын ямар өөрчлөлт оруулах гэж байгаа юм бэ?
-Дээрх хуулийн асуудлыг өнгөрсөн долоо хоногийн бүлгийн хуралдаанаар хэлэлцсэн. Сонгуулийн тухай хууль, Улс төрийн намуудын тухай хуульд өөрчлөлт оруулахдаа УИХ-ын даргын захирамжаар УИХ-аас ажлын хэсэг гаргахаар шийдсэн. Сонгуулийн хуулийг УИХ- ын дэд дарга Л.Энх-Амгалан, Улс төрийн намуудын тухай хуулийг УИХ-ын гишүүн С.Бямбацогтоор ахлуулах ажлын хэсгийн захирамж гарсан. УИХ-ын 2016 оны сонгууль Сонгуулийн тухай нэг хуулиар явсан. Ерөнхийлөгчийн сонгууль болохын өмнө Сонгуулийн тухай хууль гурван хуультай байх ёстой гэж ярилцаж байгаад амжаагүй. Одоо бол Ерөнхийлөгчийн сонгуулийн тухай, УИХ-ын сонгуулийн тухай, Орон нутгийн сонгуулийн тухай гэсэн гурван чиглэлээр боловсруулж өргөн мэдүүлэхээр ярилцаж байна.
-Улс төрийн намуудын санхүүжилтийн хууль гэж тусдаа хууль байх уу?
-Улс төрийн намын санхүүжилтийн тухай хууль гэж тусдаа гаргах уу эсвэл Улс төрийн намуудын тухай хуульдаа энэ асуудлыг оруулах уу гэдэг талаар ярилцаж байна.
-Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуульд ямар өөрчлөлт оруулж байгаа вэ?
-Энэ хуулийн нэмэлт өөрчлөлтөд УИХ-ын гишүүд санаа, оноогоо хэлж байна. Яг ийм тийм өөрчлөлт оруулна гэсэн нарийн тодорхой зүйл одоохондоо алга. Өмнөх дөрөв таван жил ямар хүрэээнд энэ асуудлыг шийдэж ирсэн, тэр жишгээрээ явах ёстой.
-Намрын чуулганаар УИХ хэр чадамжтай ажилласан гэж та бодож байна вэ?
-Ерөнхийдөө том зургаараа бол боломжийн сайн ажиллалаа гэж харж байна. Тэр дундаа нийгмийн хамгааллын чиглэлийн хэд хэдэн хууль баталсныг та бүхэн мэдэж байгаа. Найман сараас хойш амаргүй нөхцөл байдалд ажилласан. Төсөв, тодотгол хэлэлцэх, Засгийн газар шинээр бүрэлдэх гээд цаг хугацаа алдсан зүйл их бий. Гэхдээ УИХ чуулганы үйл ажиллагааг хэвийн явуулж, боломжийн ажилласан гэж үзэж байна.
С.Юмсүрэн
