Өнгөрсөн долоо хоногийн амралтын өдөр буюу бямба гарагт нийслэл даяар төдийгүй зарим аймагт цахилгааны тасалдал гарсан нь иргэдийг бухимдуулж, амгалан тайван байдлыг алдагдуулснаар зогсохгүй, манай улсын эрчим хүчний хангамж ямар түвшинд байгааг харуулсан явдал боллоо. Дулааны IV цахилгаан станц 00 /тэг/ зогсолтын горимд шилжиж, үйлдвэрлэлийг эхнээс нь явуулах шаардлага үүссэн байна. Үүний улмаас нийслэлийн төвийн зургаан дүүрэг бүхэлдээ цахилгаанаар тасалдаж, үйлдвэрлэл, үйлчилгээ зогссон юм. Энэ талаар Дулааны IV цахилгаан станцын ерөнхий инженерийн орлогч ярихдаа “Станцад ямар нэг осол аваар гараагүй. Гэхдээ юунаас болж станцын үйл ажиллагаа алдагдав гэдгийг хэвийн горимд орсны дараа тодруулна” гэжээ. Бямба гарагийн өглөө 09.54 цагт дулааны сэлгэн залгалт хийх үед станц бүхэлдээ зогссон байна. Ийм байдал сүүлийн 10 жилд гараагүйг мэргэжлийн хүмүүс тодотгож байгаа юм.
Энэ үеэр эрүүл мэндийн байгууллагууд цахилгааны нөөц хуримтлалаа ашиглаж, үйл ажиллагааг хэвийн явуулж байсан бөгөөд улсын төв нэгдүгээр эмнэлэгт бүдүүн гэдэсний хорт хавдар, Шастины нэрэмжит гуравдугаар төв эмнэлэгт бөөрний мэс заслыг төлөвлөгөөний дагуу амжилттай хийж гүйцэтгэсэн байна. Үүнээс гадна нийслэлийн амаржих газруудад 28, Эх хүүхдийн эрүүл мэндийн төвд есөн ээж хэвийн нярайлж, хүүхдийнхээ дууг сонсч баярлажээ. Таван аймагт цахилгаан, эрчим хүч доголдсон ч эрүүл мэндийн тусламж үйлчилгээг зохих ёсоор хүргэж байсныг ЭМЯ- наас мэдээлсэн байна.
Харин дээрх эрчим хүчний доголдол нь станцын гэмтэл, аваар осолтой холбоогүй болохыг салбарын яамнаас мэдээлж байгаа юм. Энэ талаар тухайн үед Хөвсгөл аймагт ажиллаж байсан Эрчим хүчний сайд Ц.Даваасүрэнгээс тодруулахад “Энэ нь ямар нэг осол гэмтэлтэй холбоогүй, зөвхөн үйлдвэрлэлийн технологийн процесстой хамааралтай юм шиг байна. Тиймээс үйл ажиллагааг сэргээхэд хялбар байлаа. Улс орон даяар бус нийслэлийн гол хэрэглэгч, зарим аймагт тасалдал гарсан. Үүний шалтгааныг бид судалж байгаа ч урьдчилан авсан мэдээллээр сэлгэн залгалтын үед технологийн горим зөрчигдсөн байх магадлалтай гэж үзэж байна” гэсэн тайлбар хэлж байлаа. Энэ байдалтай холбогдуулан Эрчим хүчний сайд хэлэхдээ, нар, салхи зэрэг сэргээгдэх эрчим хүчний үйлдвэрлэлд ч хязгаар тавьж байгаа нь манай дулаан, цахилгааны систем бие даасан, боломжийн найдвартай эх үүсвэр биш болохыг харуулж байгааг онцолж байлаа. Энэ оны тавдугаар сарын 30-нд болсон Засгийн газрын ээлжит хуралдаанаар эрчим хүчний салбарын өнөөгийн байдал, эх үүсвэрийн хүчин чадлын дутагдал, ойрын хугацаанд зайлшгүй авч хэрэгжүүлэх арга хэмжээний талаар Үндэсний аюулгүй байдлын зөвлөлд танилцуулах талаар ярилцаж байсан. Үүнийг албан ёсоор танилцуулсан эсэхийг мэдэхгүй.
Ямартай ч өнгөрсөн өвөл эрчим хүчний нэгдсэн систем хүчин чадлаа дээд цэгт нь тултал ашиглаж, нэгдүгээр сарын 25- ны өдөр 1262 МВт-ын ачааллыг арай гэж дааж байсан гэнэ. Ер нь дундаж оргил ачаалал нь 1081 МВт байдаг аж. Эрчим хүчний сайд Ц.Даваасүрэн ирэх өвлийн бэлтгэлийг хангах, нийслэлийн агаарын бохирдлыг бууруулах ажлын хүрээнд “ДЦС-3”, “Улаанбаатар цахилгаан түгээх сүлжээ” төрийн өмчит компанийн зарим нэгжид ажиллахад, гүйцэтгэл 80.3 хувьтай байгаа талаар удирдлагууд танилцуулж байсан. “ДЦС-3” компанийн хувьд 250 МВт-ын өргөтгөл барихаар техник эдийн засгийн үндэслэлээ гаргасан. Энэ асуудлаар Ц.Даваасүрэн сайд ОХУ-д аравдугаар сарын эхээр айлчлал хийхээр төлөвлөж, хөнгөлөлттэй зээлийн хүлээлт үүссэн цаг үед ийм явдал боллоо.
Д.МӨНХ
