Оюутолгойн орлогыг Монголын банкаар дамжуулах тухай асуудал дараачийн шатандаа оржээ. Монголбанкны дэд Ерөнхийлөгчөөр ахлуулсан ажлын хэсгийнхэн Оюутолгой ХК-ийн удирдлагуудтай уулзаж яриа хэлэлцээр хийж байгаа аж.
Энэ талаар Монголбанкны Ерөнхийлөгч хэлэхдээ, “Тодорхой аж ахуйн нэгжийн дансыг Монголбанкинд байршуулахыг дэмжихгүй, мөн эсэргүүцэхгүй. Хуулийн дагуу энэ бол УИХ-ын асуудал гэлээ”. Тэрбээр “Аль ч орны төв банк санхүүгийн зуучлагчийн хувьд Засгийн газар болон арилжааны банктай л харилцдаг. Аж ахуйн нэгжтэй харилцдаг төв банк гэж байдаггүй. Гэхдээ Монгол орны онцлог, нөхцөл байдлыг нь харгалзан үзээд валютын өндөр орлоготой аж ахуйн нэгжийн дансыг Монголбанкин дээр байршуулах боломжтой" гэж ярилаа.
Тус компани сар бүр оруулж буй ам доллараа өндөр үнэ амласан арилжааны банкинд түр хугацаагаар байршуулж буйг Монголбанкнаас анхааруулж зогсоогоод байгаа юм. Учир нь хуулиар валютын дуудлага худалдаа явуулах эрх зөвхөн Төвбанкинд бий.
Сардаа 70-80 сая ам долларын хөрөнгө оруулалт Оюутолгойд хийгдэж байгаа аж. Тус компани мөнгөө Монгол дахь банкуудаар дамжуулахгүй биш дамжуулсаар ирсэн.
“Гэхдээ дурын нэг татварын байцаагч арилжааны банкин дахь дансыг нь хаачихдаг” гэсэн гомдлыг тус компаниас гаргаж байгаа тул Төв банкиндаа байршуулах санал гарсан юм билээ.
Тодруулбал, 2016 онд өмнө арилжааны банкин дахь дансыг нь хааж, шалгалт явуулж байна хэмээн хоёр чингэлэг бүхий баримт бичгийг хоёр жилийн турш дарсан явдал болсон юм билээ. Энэ хооронд гадаад дотоод гуйвуулга саатаж хөрөнгө оруулагчдынхаа өмнө эвгүй байдалд орж байжээ.
“Оюу толгой” компани Монгол Улсын Засгийн газарт 2010 оноос эхлэн 2018 оны гуравдугаар улирлын байдлаар 1.6 тэрбум ам.долларыг татвар, хураамж болон бусад төлбөрт өгөөд байна.
“Оюу толгой” компани 2018 оны III улирлын гүйцэтгэлийн тайлангаа танилцуулснаас харвал, 2018 оны есдүгээр сарын байдлаар гэхэд 152 сая ам.доллар төлсөн байна.
eagle.mn
