ЖДҮ-ийг хөгжүүлэх сангаас зээл авсан УИХ-ын гишүүдийг баримт ар араасаа ил болсоор байна. Үүний нэг нь УИХ-ын гишүүн Б.Ундармаа өөрийн хамаарал бүхий “Капитал” банкиндаа жилийн 7 хувийн хүүтэй, 48 тэрбум төгрөгийн зээлийг ЖДҮ-ийг хөгжүүлэх сангаас авчихаад буцааж төлөхгүй байна хэмээн “Баялаг бүтээгчдийг дэмжих холбоо”-ноос мэдээлэл хийлээ.
“Баялаг бүтээгчдийн холбоо”-ны гүйцэтгэх захирал Х.Батдэлгэр “Б.Ундармаа өөрийн хамаарал бүхий “Капитал” банк жилийн 7 хувийн хүүтэй, 48 тэрбум төгрөгийн зээлийг ЖДҮ-ийг хөгжүүлэх сангаас авч, ЖДҮХС-гийн дамжуулан зээлдэгчийн үүрэг гүйцэтгэж 2011 он, 2016 онд гэрээ байгуулан иргэд болон ААН-үүдэд зээл олгосон боловч энэ зээлийн эргэн төлөлтөө ЖДҮХС-д өгөхгүй байгаа талаар мэдээлэв.
Тодруулбал, 2017 оны 10 сарын 10-ны өдөр Сангийн сайдын үүрэг гүйцэтгэгч, ХХААХҮ-ийн сайдын үүрэг гүйцэтгэгч, Капитал банкны гүйцэтгэх захирал гурав хамтарсан гэрээ байгуулсан байдаг. Энэ гэрээ нь 2011 оны зээлийн гэрээний үлдэгдэл 28 тэрбум, 2016 оны зээлийн гэрээний үлдэгдэл 17 тэрбум төгрөг, энэ хоёр гэрээний хуримтлагдсан алданг гэж хоёр тэрбум төгрөг нийлээд 48 тэрбум 447 сая төгрөгийг жилийн 7 хувийн хүүтэй, гурван жилийн хугацаатай, үндсэн төлбөрөөс нэг жилээр чөлөөлөгдөх, алданги нь 0.014 хувь байх гэрээ байдаг. Мөн тус гэрээнийн хамгийн эхэнд төсвийн тухай хуулийн 38.1.10, Монгол Улсын Засгийн газрын хуралдааны 2017 оны 10 сарын 3-ны өдрийн 43 дугаар тэмдэглэлийг үндэслэн гэж бичсэн байгаа. Гэтэл тэр 43 дугаар тэмдэглэл дээр нь энэ гэрээний талаар огт дурдаагүй байна. Тэгэхээр зориуд худал бичсэн болж харагдаж байна. Хэрэв энэ мөнгө цаг хугацаандаа ЖДҮХС-д орсон бол Хэрэв энэ мөнгө цаг хугацаандаа ЖДҮХС-д орсон бол Баялаг бүтээгч ЖДҮ эрхлэгчид олон ажлын байрыг нэмэгдүүлж, Монгол Улсад үйлдвэрлэлийг хөгжүүлэх байсан.
Гэтэл УИХ-ын гишүүн Б.Ундармаагийн 99.98 хувийг нь эзэмшдэг “Капитал” ийм гэрээ хийчихээд, ЖДҮХС-гаас зээл авсан нь ЖДҮ-ийн тухай хуулийн 8.1-д заасан банк болон банк бус санхүүгийн байгууллагыг жижиг дунд үйлдвэрлэл гэж үзэхгүй гэсэн заалтыг ил цагаанаар зөрчиж байна. Дээрээс нь “Капитал” банк 48 тэрбум төгрөг зээлсэн гэрээнийхээ үүргийг өнөөдрийг хүртэл биелүүлэхгүй, төлбөрийн хуваарь дээр капитал банкнаас дөрвөн удаа л гэрээний дагуу төлбөр шилжүүлээд хамгийн сүүлд 2018.02.28-ны өдөр төлөх ёстой байсан 260 сая 154 мянган төгрөгөө хугацаа хэтрүүлж 2018.06.05-нд төлсөн. Үүнээс хойш өнөөдрийг хүртэл мөнгөө төлөхгүй байгаа. Өөрөөр хэлбэл, өнөөдрийг хүртэл төлөх ёстой 4 тэрбум төгрөгийн өр үүссэн байдалтай байна.
Тиймээс өнгөрсөн долоо хоногт бид яг энэ асуудлаар АТГ-т хандсан. Тиймээс УИХ-ын гишүүн Б.Ундармаа ёс зүйн хариуцлага хүлээх үү, эрүүгийн хариуцлага хүлээх үү гэдэг нь АТГ-т хийгдэж буй шалгалтаар нотлогдох байх. Мөн Баялаг бүтээгчдийн холбооноос УИХ-ын гишүүн Б.Ундармаа, УИХ-ын гишүүн Б.Чойжилсүрэн нарыг шалгуулахаар өгсөн байгаа" гэв.
olloo.mn
