“World Cup 2018”-ын сугалааг татсаны дараахан “TyС Sports”-ийн сэтгүүлч Аргентиний шигшээ багийн ахлагч Лионель Месситэй ярилцсаныг товчлон сонирхуулъя.
ДАШТ-ИЙ ТУХАЙ
Хэрвээ Аргентин дэлхийн аваргад өрсөлдөх эрхээ авч чадаагүй бол бид үндэсний шигшээ багаа орхих нь шударга ёсонд нийцэх байлаа. Хэсгийн өрсөлдөгчдийн тухайд гэвэл Хорваттай нээлттэй тоглох боломжтой. Харин Исландын арын шугам үргэлж хаалттай байдаг. Ийм багийн нягт хамгаалалтыг сэтлэх маш хэцүү.
Бид хүнд үеийг туулж байна. Гэхдээ дэлхийн аварга болохын тулд улам сайжрах нь чухал. Дэлхийн аварга шалгаруулах тэмцээн эхлэхээс сарын өмнө цугларалтад гарчих боломжтой нь сайн хэрэг. Өнөөдөр бид Бразил, Герман, Франц, Испанийн түвшинд тоглож чадахгүй байгаа ч хугацаа бий.
Сампаолиг ирснээс хойш багийн тоглолт бага багаар сайжирч байгаа. Гэхдээ тэр маш цөөхөн тоглолтод багаа удирдсаныг санах хэрэгтэй. Түүнээс гадна дарамт шахалт, шигшээд ирсэн шинэ залуустай хөл нийлэн тоглох... гэх мэтийн өөр асуудал байна. Урьд нь хамтдаа тоглож байгаагүй тоглогчидтой нэг баг болоход заримдаа огт өөрөөр тоглох шаардлагатай болдог.
КУН АГУЭРОГИЙН ТУХАЙ
Кун Агуэро “Манчестер сити”-д амжилттай тоглож, сайн бэлтгэлтэй нь бидэнд найдлага төрүүлж байна. Тэр бол дэлхийн шилдэг довтлогчдын нэг. Түүний ур чадвар, боломжийг үнэлдэг дасгалжуулагчдын нэг Хорхе Сампаоли шигшээд ирсэн нь давуу тал юм. Одоо Агуэрод өөртөө итгэлтэй тоглож, эргэлзэгчид, шүүмжлэгчдэд хариулт өгөх л үлдлээ.
ШИГШЭЭ БАГИЙН ТУХАЙ
Бүх тоглогч шигшээ багтаа амжилт гаргахыг хүсэж байна. Гурван том тэмцээний шигшээд хожигдоход ямар байдгийг хэр баргийн хүн ойлгохгүй. Дэлхийн аваргын дараах “Copa America”-гаас эхлэн олон нийтийн зүгээс дарамт шахалт маш их болсон. Ялангуяа Аргентинд тоглох их хэцүү. Заримдаа аялан тоглох нь илүү амар санагддаг. Бидэнд үл итгэгчид багийн тоглолтоос гадна талбайн гаднахыг хүртэл шүүмжилдэг нь хачирхалтай. Магадгүй тэд биднийг шигшээ багаас холдуулахыг хүсдэг ч байж мэднэ.
МАШЕРАНО “БАРСЕЛОНА”-Г ОРХИХ ТУХАЙ
Тэр илүү олон минутыг талбайд өнгөрүүлэхийг хүсэж буйг сайн ойлгож байна. Харамсалтай нь, одоогийн “Барса”-д Машераногийн орон зай улам хумигдсаар ирлээ.
ХОРХЕ САМПАОЛИГИЙН ТУХАЙ
Дасгалжуулагч өөрийн санал бодлоо бидэнтэй чөлөөтэй хуваалцдаг. Би хэзээ ч түүнд “Надад тэр тоглогч таалагддаг, энэ нь бүтэхгүй байна” гэж хэлж зүрхлэхгүй. Шигшээ баг Мессигийн найзууд, түүнтэй сайн харилцаатай тоглогчдоор дүүрсэн гэх мэтийн утгатай мэдээлэл гарч л байдаг. Хэзээ ч тийм зүйл болохгүй гэдгийг хэлье. Сампаоли Чилийн шигшээг амжилттай дасгалжуулж, тивийн аварга болгосон. Хэдий тэр сайн мэргэжилтэн ч Аргентиний шигшээ багийг дасгалжуулах нь онцгой бөгөөд адармаатай ажил.
АМРАХ ТУХАЙ
Урт улирлын туршид аль болох амарч байхын ашиг тусыг одоо л ойлгож байна. Жилээс жилд бие организм хэт их ачааллыг дийлэхээ болих нь тодорхой. Заримдаа сэлгээнд суух зүгээр шүү дээ. Тоглолтыг хөндлөнгөөс харахад их өөр, заримдаа талбайд хэрэгжүүлж болохоор шинэ санаа ч төрнө. Учир нь тоглолтын үеэр өргөн хүрээтэй сэтгэж, талбайг бүхэлд нь мэдрэх хэцүү байдаг.
М.Оргил
Эх сурвалж: Өнөөдөр сонин
