УИХ-ын гишүүн Л.Оюун-Эрдэнэ тэргүүтэй гишүүд УИХ-ын дарга М.Энхболдыг албан тушаалаасаа чөлөөлөгдөх хүртэл УИХ-ын чуулганы хуралдаанд суухгүй гэж мэдэгдсэн. Өнгөрсөн пүрэв гаригт УИХ-ын дарга М.Энхболд “бойкот” зарласан УИХ-ын гишүүдийн төлөөллийг авч уулзах үеэр Л.Оюун-Эрдэнэ гишүүн энэ сарын 10-ны өдөр буюу өнөөдөр үүрэгт ажлаасаа чөлөөлөгдөхгүй бол тэмцлийн хурцын хурц хэлбэрт шилжинэ гэж мэдэгдсэн. Тэгвэл УИХ-ын дарга М.Энхболдоос өнөөдөр шаардлагын хариуг хүргүүлсэн эсэх талаар УИХ-ын гишүүн Л.Оюун-Эрдэнээс тодрууллаа.
Тэрбээр “Энэ долоо хоногийн чуулганы хуралдааныг бойкотлоно. Одоо хангалттай. Үүнээс цааш иргэдийг илүү их бухимдуулж, жагсаал цуглаан хийлгэж, өндгөөр шидүүлж улс төрд битгий хэл Монголд ч байхад хэцүү болох хэмжээнд хүргэж карьераа өндөрлүүлэх ямар шаардлага байгаа юм бэ. Би үүнийг ойлгохгүй байна. Өчигдрөөс эхлээд “Хүн чанар”-ын тухай постуудыг над руу явуулж байна. 60 тэрбумын хэрэг нь М.Энхболд гэх хувь хүнтэй холбоотой асуудал биш юм. Хувь хүнтэй холбоотой байсан ч хүн чанар ярих эрхтэй хүн биш. Энхийн цагаан тагтаа аятай жүжиг тоглоод хэрэггүй. Ядаж л миний ээж, аав руу битгий дайраач ээ. Ярьж буй асуудлууд зарчмынх шүү. Нийгэм энэ хүнийг УИХ-ын даргаар хүлээж авч чадахгүй байна.
Өнөөдрийн талцал, хуваагдлын эхлэлийг энэ хүн л тавьсан. Системийн гажуудлын эхлэлийг энэ хүн л тавьсан. Парламентын ихэнх гишүүн УИХ-ын даргыг хүлээн зөвшөөрөхгүй байна. “60 тэрбум”-ын хэргийн асуудлаар нийтийн сонсгол хийе гэж зунжин шаардахад хуулийн хүрээнд боломжгүй гэсэн хариулт өгч байсан мөртлөө баасан гаригт чуулганы хуралдаанаар нээлттэй сонсгол хийх үүргийг өгч байна гэж ярьж байна. Бүр үүрэг өгч байна гэсэн. Асуудлыг энэ хэмжээнд хүргэчихээд Төрийн байгуулалтын байнгын хороог хуралдуулна гэсэн. Яагаад одоо ингэж ярьж байгаа юм. Өөрийгөө хууль, төр, УИХ гээд бодчихсон. Эрх зүйд төрийн эзэн болчихсон байна. Нэг өдөр хуулийн бүх байгууллагыг хөдөлгөж чадаж байна. Хуулийн байгууллагын дээр энэ хүн гарсан байна” гэлээ.
