Цаг уурын өөрчлөлт, нийгмээ дагасан олон шаардлага дор өдгөөгөөс 30 жилийн өмнө буюу БНМАУ-ын АИХ-ын Тэргүүлэгчдийн 1987 оны 12 сарын 09-ний өдрийн 169 дүгээр зарлигаар Байгаль орчныг хамгаалах яамыг байгуулж байсан түүхтэй. Монгол Улс Байгаль орчныг хамгаалах яамтай болсноор байгаль цаг уурын өөрчөлт, уул уурхайн ашиглалт, нөхөн сэргээлт, үйлдвэрлэл бүтээн байгуулалттай холбоотойгоор байгаль орчинд үүсч буй сөрөг зүйлд хяналт тавих нөхөн сэргээхээс эхлээд олон ажил чиг үүргийн дагуу амжиттай хэрэгжиж иржээ. Томоохон агуулгаар авч үзвэл олон улсын хэмжээний конвецэд нэгдэн орж дэлхийн чиг хандлагыг төрийн хэмжээнд боловсруулсан баримт бичиг болгоход томоохон үүрэг гүйцэтгэсэн болно.
Байгаль орчныг хамгаалах яамыг тухайн үеийн Ус цаг уурын албыг удирдах ерөнхий газрыг түшиглэн байгуулсан цагаас хойш 1990 оны есдүгээр сарын 26-ны өдрийн БНМАУ-ын Засгийн газрын бүрэлдхүүнийг тогтоох тухай хуулиар Байгаль орчны хяналтын улсын хороо нэртэйгээр ажиллаж,1992, 1996, 2000, 2004, 2008, 2012 онуудад Засгийн газрын бүтцийн тухай хуулийн дагуу байгаль орчны салбарын бодлогыг тодорхойлж ирсэн билээ. Одоогийн Байгаль орчин, аялал жуулчлалын яам нь 2016 оны 7 дугаар сарын 21-ний өдрийн “Монгол Улсын Засгийн газрын бүтцийн тухай” хуулийн дагуу байгаль орчин, аялал жуулчлалын салбарыг бодлогын хүрээнд удирдан үйл ажиллагаа явуулж байна. Байгаль орчин, аялал жуулчлалын яамны харьяанд одоогийн байдлаар Засгийн газрын хэрэгжүүлэгч агентлаг-Цаг уур орчны шинжилгээний газар (Ус, цаг уур, орчны судалгаа мэдээллийн хүрээлэн, Байгаль орчин, хэмжил зүйн төв лаборатори, Нислэгийн цаг уурын төв, Аймаг, Нийслэлийн Ус цаг уур орчны шинжилгээний 22 газар), Улсын тусгай хамгаалалттай газрын Хамгаалалтын 30 захиргаад, Усны сав газрын 21 захиргаад, Улсын төсөвт “Цэнгэг усны нөөц, байгаль хамгаалах төв”, “Ойн судалгаа хөгжлийн төв”, Төрийн өмчит “Монгол Ус”, “Монгол Кувейтийн судалгааны төв” , “Аялал жуулчлалын хөгжлийн төв” үйлдвэрийн газрууд, Байгаль хамгаалах сан гээд хүрээгээ улам бүр тэлэн ажиллаж байна.
БОАЖЯ-ны эрхэм зорилго нь эдийн засаг, нийгмийн хөгжлийн хандлагыг экосистемийн тэнцвэрт байдлыг алдагдуулахгүй байхад чиглүүлж, байгалийн нөөц баялгийг зохистой ашиглах, жам ёсоор нөхөн сэргэх боломжийг бүрдүүлэх, байгальд ээлтэй тогтвортой аялал жуулчлалыг хөгжүүлэх замаар хүрээлэн байгаа орчны тогвортой байдлыг хадгалж, ногоон хөгжлийг хангах үйл ажиллагаанд төр, иргэн, аж ахуйн нэгж, байгууллагын хамтын ажиллагаа, хүчин чармайлтыг өрнүүлж хүний эрүүл, аюулгүй орчинд амьдрах эрхийг хангахад оршиж байна. Ингээд тус салбарт ажиллаж байсан үе үеийн алба хаагчид, өдгөө ажиллаж буй та бүхэндээ 30 жилийн ойн баярын мэнд хүргэж ажил үйлсэд амжилт хүсье.
“Shuurhai.mn” мэдээллийн сайтын редакци
