Нийслэлийн тэргүүлэгчдийн хуралдаанаас өнөөдрийн НИТХ-аар хотын шинэ даргыг томилохоор, хэлэлцэх асуудлын дараалалд оруулсан. Энэ дагуу өнөөдөр НИТХ-аар хотын даргад нэр дэвшигчдийн асуудлыг хэлэлцэж, төлөөлөгчдийн олонхийн саналаар томилгоог хийх юм. Үүнээс өмнө НИТХ-ын тэргүүлэгчид хуралдаж, хотын даргад хэнийг нэр дэвшүүлэхээ шийднэ. Уг нэрээ МАН-ын Удирдах зөвлөлөөр хэлэлцүүлэн, НИТХ дахь МАН-ын бүлгээр оруулан шийдвэрээ гаргах учиртай.
Өчигдөр НИТХ-ын тэргүүлэгчид болон МАН-ын Удирдах зөвлөл хуралдах байсан ч хойшилсон. Тиймээс өнөөдөр дээр дурдсан хурлууд бүгд болохоор төлөвлөгдөөд байна. Хотын даргад Баянзүрх дүүргийн засаг дарга асан Б.Мөнхбаатар, НИТХ-ын дарга С.Амарсайхан нар нэр дэвшихээр яригдаж буй. Б.Мөнхбаатар, С.Амарсайхан нар нь хоёулаа У.Хүрэлсүхийн талын хүмүүс тул намын Удирдах зөвлөл дээр нэр гаргахад ихээхэн асуудалтай байгаа аж.
Уг нь Ерөнхий сайд У.Хүрэлсүх, Нийслэлийн МАН-ын хорооны дарга Д.Сумъяабазар нар Б.Мөнхбаатарыг дэмжиж байгаа гэх мэдээллийг намаас нь өгч байна. Гэвч Нийслэлийн иргэдийн хурлын төлөөлөгчдийн зүгээс НИТХ дундаасаа хотын даргаа томилох сонирхолтой байгаа аж. Тиймээс МАН-ын Удирдах зөвлөлөөс С.Амарсайхан, Б.Мөнхбаатар аль нэгнийх нь нэрийг НИТХ руу оруулж, заалнаас нөгөө нь нэр дэвшин өрсөлдөхөөр байна.
НИТХ суудалтай. Үүнээс МАН 34, АН 11 төлөөлөгчтэй билээ. Одоогоор санал хураалтад сөрөг хүчний 11 төлөөлөгч С.Амарсайхан, Б.Мөнхбаатар нарын хэнийг нь дэмжих нь тодорхойгүй байна. Мөн НИТХ-ын дарга асан Ц.Сандуйгийн фракци аль талд санал өгөхөөр тохироо хийсэн нь тодорхойгүй байгаа юм.
