Хот хөдөөгүй шинэ жилээ тэмдэглэж  хэсэгтээ л “нялхарлаа” монголчууд. Харин үүний  араас зарим нэг таагүй мэдээ чих дэлсэж байгаа нь тиймхэн. Тодруулбал, бас л төриийн албаныхан баяр тэмдэглэж байгаад  дарга нь  агсан тавьж  “цэрэг”-ээ   гэмтээсэн тухай мэдээ Дундговиос ирлээ.

Тус  аймгийн ИТХ-ын дарга С.Сүхбаатар сумдын ИТХ-ын дарга, нарийн бичгийн дарга нарыг оролцуулсан "Нутгийн өөрөө удирдах байгууллагын шинэ жил” дээрээ  агсан тавьж ИТХ-ын ажлын албаны ажилтан Ш.Оюуны толгой руу  шампанск дарсны шилээр цохиж  гэмтээжээ.

Тархиндаа гэмтэл авсан  эмэгтэй тэр шөнөдөө толгойндоо  хэд хэдэн оёдол тавиулжээ.  Хохирогч эмэгтэйн бие одоо сайнгүй байгаа бөгөөд толгой тархи нь дүйнгэтэж өвдөөд байгаа учир Улаанбаатар руу эмчилгээнд явж Томографийн аппаратад орж гэмтлээ тогтоолгож эмчлүүлэх гэж байгаа  аж.

Энэ хэрэг явдлын маргааш С.Сүхбаатар уучлал гуйж гэрт нь очсон ч Оюун "Гомдолтой" гэдгээ хэлсэн тухай эх сурвалж мэдээллээ.

Оны өмнөхөн болсон МАН-ын Бага хурал дээр “Дундговь гэж жижигхэн аймгийн жижиг дарга” хэмээн өөрийгөө тодотгож байсан  С.Сүхбаатарын хүн зодсон дуулиан анхных нь энэ бас биш. Тэрбээр хэдэн жилийн өмнө аймгийнхаа ИТХ-ын дарга С.Буджав гэдэг залууг зодож  танхайрч байсан удаатай.

Г.Ган-Өлзий

Эх сурвалж: Zaluu.com