Прокурорын байгууллагаас нэр бүхий гишүүдийн бүрэн эрхийг түтгэлзүүлэх асуудлыг оруулж ирэхээр бэлдсэн гэх мэдээллийг бид оны өмнө мэдээлж байсан. Тэгвэл эх сурвалжуудын мэдээлж буйгаар ЖДҮХС-гаас олгодог зээлтэй холбоотойгоор УИХ-ын нэр бүхийн 4 гишүүний бүрэн эрхийн асуудлыг УИХ-д оруулж хэлэлцүүлэхээр Их Хурлын даргад өчигдөр өргөн барьсан аж.

Мөн эх сурвалжуудын мэдээлж буйгаар ЖДҮХС-тай холбоотойгоор бүрэн эрхийн асуудлаа "хөндүүлэх" болсон 4 гишүүн нь Г.Солтан Л.Энхболд, Б.Ундармаа, Г.Дамба-Очир гэнэ.

Монгол Улсын Их Хурлын тухай хуулийн 6.9.1-д заасны дагуу "гэмт үйлдлийнх нь явцад, эсхүл гэмт хэргийн газарт нотлох баримттай нь баривчилж, улмаар бүрэн эрхийг нь түдгэлзүүлэх тухай саналыг Улсын ерөнхий прокурор Улсын Их Хуралд оруулсан".

Мөн хуулийн 6.9.2-д "гишүүнд холбогдуулан эрүүгийн хэрэг үүсгэсэн бөгөөд Улсын ерөнхий прокурор түүний бүрэн эрхийг түдгэлзүүлэх тухай саналыг Улсын Их Хуралд оруулсан тохиодолд ажлын 2 өдөрт /48цаг/ холбогдох байнгын хороод, дэд хороогоор уг асуудлыг хэлэлцэж түтгэлзүүлэх эсэхийг шийдвэрлэнэ" гэж тус тус заасан байдаг. Хэрэв чуулганы чөлөөт цагт гишүүний бүрэн эрхийг түтгэлзүүлэх асуудлыг оруулж ирсэн бол 24 цагийн дотор ээлжит бус чуулган зарлан хуралдуулдаг хуулийн заалттай.

Тиймээс хуулийн дагуу дээрх нэр бүхий гишүүдэд эрүүгийн хэрэг үүсгэж бүрэн эрхийг нь түтгэлзүүлэх эсэхийг өнөөдөр болон маргаашийн дотор хэлэлцэж шийдэх юм.

Мөн эх сурвалжуудын мэдээлж буйгаар гишүүдийн бүрэн эрхийг түтгэлзүүлэх асуудлыг УИХ-д өчигдөр /2019.01.08/ 14.00 цагийн үед өргөн барьсан бололтой. Хэрэв тийм бол маргааш буюу 2019.01.10-ны 14.00 цагаас өмнө уг асуудлыг Төрийн байгуулалтын байнгын хороо, Хууль зүйн байнгын хороод болон Улсын Их Хурлын гишүүний халдашгүй байдлын дэд хороо холбогдох санал, дүгнэлтээ гаргаж, үүнийг нь үндэслэн пүрэв гаригт хуралдах УИХ-ын нэгдсэн чуулганаар хэлэлцэж эцэслэн шийдвэрлэнэ.

Дашрамд сануулахад УИХ-ын гишүүний бүрэн эрхийг түтгэлзүүлэх асуудлыг нууц санал хураалтаар шийдвэрлэдэг билээ.

Б.Анир