УИХ-ын гишүүн Ж.Мөнхбат өнөөдөр Төрийн ордонд цаг үеийн асуудлаар мэдээлэл хийлээ. Тэрбээр, "УИХ-ын гишүүн, АН-аас өөрийгөө гарсанд тооцоод байгаа Л.Болд "Богд" банкны эзэн, бас "Голомт" банкны эзэн байсан хүн намайг жагсаал цуглааны үеэр үймээн самуун, цуст мөргөлдөөнд турхирч, цэрэг хүчнийхэн цаана нь бэлдсэн байгаа гэж гүтгэснийг эрс няцааж байна. Өчигдөр Н.Номтойбаяр гишүүн гадаад яваад оройны онгоцоор Улаанбаатарт буусан. Миний бие энэ жагсаалд 200 хүн байтугай хоёр хүн ч оруулаагүй. Жагсаал, цуглаан хийдэг, тэр нь нийгэмд буруудаад ирэхээр буруугаа бусдад нялзаах гэж оролддог явдал газар авч байна.Өөрийнхөө хувийн бизнесийн өр төлөөсийг төлөх гэж чичирч гүйдэг улс төр сүүлийн үед Монголын улс төрд газар авч байна. Үүний нэг нь УИХ-ын гишүүн Л.Болд гэж би бодож байна. Засгийн газрыг огцруулах асуудлыг хэлэлцэх үед би УИХ-ын гишүүн Л.Болдтой холбоотой их хэмжээний мөнгө яригдаж байгааг хэлэхэд өөрөө эрс үгүйсгэсэн.
УИХ-ын гишүүн С.Амарзаяа мэдэгдэл хийхдээ "УИХ-ын гишүүн Л.Болдын хувийн Богд банкны харилцах дээр Хөгжлийн банкнаас 30.8 тэрбум төгрөг шилжүүлж авсан гэх баримтыг ярьж байгаа. Энэ нь үнэн юм билээ. Өөрөөр хэлбэл 8 сая ам.доллар, 9.8 тэрбум төгрөгийг Хөгжлийн банкнаас Л.Болд гишүүн Богд банкин дээр авсан байна. Гаднаас нь харахад энэ банкны чанар актив сайн харагдахаар боловч харилцах дээр авсан учраас хүү төлөхгүй. Үүнийхээ улмаас хүнийг гүтгэн гүжирдэх алхам хийж байгаад нь харамсаж байна. Өнөөдөр цуст мөргөлдөөнд хүргэх, цэргийн хүчээр дарах тухай асуудал ярьсан. Цэргийн эрх мэдэл өнөөдөр Засгийн газарт, БХ-ын сайдад, ЗХЖШ-ын мэдэлд, цагдаа ХЗДХ-ийн сайдын, онцгойгийн бие бүрэлдэхүүн Шадар сайдын, тагнуул Ерөнхий сайдын бүрэн мэдэлд байгаа. Тэгэхээр төрийн ордны коридорт алхаж байгаа жирийн гишүүн надад яагаад цэрэг цуглуулж, зэвсэгт мөргөлдөөнд хүргэх нөхцөл үүсэх вэ гэдгийг Л.Болдоос асуусан. Гэтэл "Тагнуулын эрх мэдэлтэн надад энэ мэдээллийг өгсөн" гэсэн. Тэгэхээр биш өнөөдөр тагнуулын байгууллагад асуулга тавьж, Л.Болд гишүүнийг шүүхэд өгч байгаа гэдгээ албан ёсоор хэлье" хэмээлээ.
