Монгол Улсын Ерөнхийлөгч Х.Баттулга уржигдар Прокурорын байгууллагын удирдах ажилтны зөвлөгөөнд оролцох үеэрээ өмнөх Ерөнхийлөгч Ц.Элбэгдоржийг шалгуулах хүсэлтийг гаргалаа. Тэрээр үүнийгээ “…Баттулга гэдэг иргэнийхээ хувьд хандаж байна” гэсэн юм.
Тэрээр Прокурорын байгууллагын удирдлагуудад хандаж хэлэхдээ “…Ерөнхий прокурор М.Энх-Амгалан ЖДҮХС-гаас зээл авсан УИХ-ын гишүүд, сайд нарын асуудлыг чуулганаар оруулах үедээ “Шударга ёс энэ танхимаас эхлэх ёстой. Хаана байна, шударга ёс?” гэж асууж байсан. Үүнийг Монгол орон даяар харж, сонссон. Би яг тэр асуултыг энэ танхимд давтмаар байна. Шударга ёсыг та нар энэ танхимаас эхлүүлэх ёстой. Ийм тангарагтай, ийм мөрдэстэй хүмүүс шүү, та бүхэн.
Жижиг, дунд үйлдвэрлэлтэй холбоотой бас нэг тодорхой асуудал нь Улсын Ерөнхий Прокурорын орлогч Б.Амгаланбаатар ЖДҮХС-аас хоёр жил дараалан зээл авсан нь тогтоогдсон. Өөрөө үүнийгээ хүлээсэн. Өнөөдөр ямар ч хариуцлага хүлээгээгүй албан тушаалаа хашаад сууж байхад Ерөнхий прокурор нь бусдаас шударга ёс нэхэх утга учир байна уу, иргэд хүлээж авах уу?
…Энэ асуудал УИХ-ын танхимд яригдсаар л байна. Мөн Улсын ерөнхий аудитор яг ийм асуудлаас шалтгаалан ажлаасаа халагдсан. Албан тушаалаасаа чөлөөлөгдөөд шалгуулж байгаа. Ерөнхийлөгчийн Тамгын газарт ажиллаж байхдаа энэ сангийн зээлд нэр холбогдсон хүмүүсийг би ажлаас нь чөлөөлсөн.
Хууль тэгш үйлчлэхгүй, шударга ёс хэрэгждэггүйгээс ард иргэд бухимдалтай байна, иргэд шударга ёсыг шаардаж байна. Тэд эрх баригчдаас шударга ёс, хариуцлага нэхэж л жагсаж, цуглаж байгаагаас бус хоол, цалин нэхээгүй” гээд 60 тэрбум, С.Зоригийн амь насыг хөнөөсөн хэрэг, Салхитын мөнгийн ордын асуудал, Эрдэнэтийн 49 хувийн тулаар хөндсөн юм. Ерөнхийлөгч үг хэлснийхээ дараа “…Би Халтмаагийн Баттулга гэдэг иргэнийхээ хувиар хандаж байна. Бидний мэддэг Тавантолгойн тухай хэдэн мэдээлэл өгье. Ард түмний өмч Тавантолгойг гэрээгээр халхавчлан гадныхан 100 жилээр хууль бусаар өгөх гэж байхад 2015 онд УИХ ын 40 гишүүн авч үлдсэн юм. Энэ хуйвалдааныг ерөнхийлөгч асан Цахиагийн Элбэгдорж гардан гүйцэтгэх ажлыг зохион байгуулсан. Төрийн өмчөөр нөөцийг нь тогтоосон орд газрыг гадаадын компанид хууль бусаар өгөх гэж байсан. Үүнийг яагаад одоо болтол шалгахгүй байна вэ. Үүнтэй холбоотойгоор шалгана уу. Баримтууд нь бүгд байна. Би энэ өдөр Ерөнхий прокурор танд Прокуроруудын удирдах ажилтнуудын зөвлөгөөн дээр иргэн Х.Баттулгын хувьд 178 хуудас баримтыг гардуулж байна. Энэ хэргийг шалгуулъя. Гүйцэтгэх ажлыг нь 1996 онд Ерөнхий сайдаар ажиллаж байсан М.Энхсайхан хийсэн” гэлээ.
Үнэнийг хэлэхэд өнөөдөр Ерөнхийлөгч Х.Баттулга өмнөх Ерөнхийлөгч Ц.Элбэгдоржийг шалгуулах санал хүсэлт, заавар чиглэлийн аль нэгээр нь Прокурорын байгууллагад өгч байгааг Ц.Элбэгдоржийн Монголын төрд үлдээсэн хар өв гэж ойлгоход болох юм.
Ерөнхийлөгч асан Ц.Элбэгдорж одоогоос гурван жил гаруйн өмнө 2015 оны наймдугаар сарын 15-ны өдөр Прокурорын байгууллагын 85 жилийн ойд зориулсан баярын хуралд оролцож үг хэлэхдээ өөрийнхөө өмнөх Ерөнхийлөгч Н.Энхбаярыг шалгах ёстой гэсэн үүргийг бүтэн 90 минутын турш тавьсан байдаг юм.
Түүний үг бүхэлдээ өөрийнхөө өмнөх Ерөнхийлөгч Н.Энхбаярыг шалгах ёстой шүү, шантарч болохгүй гэсэн ухуулга байв.
Тэр үед Ерөнхийлөгч Ц.Элбэгдорж “…Цалинг чинь хоёр дахин, гурав дахин нэмж, үнэхээр Монголд мөнгө байдаг бол шүүгч нартаа, энэ прокурорууддаа хүний гар харахгүйгээр амьдрах нөхцөлийг нь бүрдүүлж өгөөд шударга ёс шаардаж байх хэрэгтэй. Өгөөд шаардаж байх хэрэгтэй. Өгөхөд тэр хариуцлага нь давхар явдаг юм. Бид нар та бүхэнд, Монголын төр та бүхэнд мөнгө өгч байгаа юм биш. Та бүхэнд хариуцлага өгч байгаа юм. Өөдөөс нь эргээд шаардана. Чи надаас гурав дахин өндөр цалин авч байгаа шүү дээ. Яагаад ийм юманд орооцолдож байгаа юм бэ. Би чиний мөнгийг төлж байгаа. Татвар төлөгчид, жирийн ард иргэд, миний хүүхэд чиний цалинг төлдөг юм аа. Чиний машины бензинийг хийж байгаа, чи яаж байгаа юм бэ гэж асуудаг болдог юм л даа” гээд тэр үед Солонгост эмчлүүлж байгаад эх орондоо ирээд байсан Ерөнхийлөгч асан Н.Энхбаярыг “…Би салхилах гэж Монголд ирлээ гэдэг. Төрийн ордон бол хүн салхилаад байх газар биш гэж бодож байна. Салхиа санаад хүний нутагт хэвтээд бай гэж хэн ч хэлээгүй шүү дээ” гэх зэргээр хэлж байлаа.
Юм гэдэг сонин. Хорвоо бөөрөнхий. Цаг хугацаа бүгдийн шалгуур гэдэг. Хар даа, өмнөх Ерөнхийлөгч Ц.Элбэгдоржийгоо одоогийн Ерөнхийлөгч Х.Баттулга шалгуулахаар прокурорт хандлаа. Энэ бол дээр хэлснээр Ц.Элбэгдоржийн Монголын төрд үлдээсэн хар өв юм. Өв гэдэг уламжлагддаг билээ.
Зууны мэдээ
Ц.Баяр
