Бусдын эд хөрөнгө хулгайлах гэмт хэрэг нь өмчийн эсрэг бусад гэмт хэргийн гаралттай өсөлт, бууралт харьцуулбал ямагт өсч, нийгмийн хор аюул буюу иргэн байгууллага, аж ахуйн нэгжид учруулсан хохирол нь байнга өсөн нэмэгдэж байгаа нь сүүлийн 10 жилийн криминологи, социологийн судалгааны дүнгээс харагдаж байна.

Хулгайлах гэмт хэргийг илрүүлэх, таслан зогсоох, урьдчилан сэргийлэх ажлыг үр нөлөөтэй явуулахад иргэдийн дэмжлэг туслалцаа зайлшгүй чухал. Өөрөөр хэлбэл нэг талаас цагдаагийн байгууллагын хуулиар хүлээсэн үүргээ сахин биелүүлэх, нөгөө талаас иргэд өөрсдийн эд хөрөнгийн бүрэн бүтэн байдалд анхаарах, хулгайн гэмт хэргийн талаар тухай бүр холбогдох байгууллагад мэдээлсэнээр та бидний аюулгүй орчинд амьдрах эрх хангагдах нөхцөл бүрдэнэ. 

Байгууллага,  аж ахуйн нэгж, иргэд өөрийн эзэмшилд байгаа эд хөрөнгийг бат бэх, найдвартай орон байр, агуулах саванд хадгалж үргэлжийн харуул хамгаалалтанд байлгах, сонор сэрэмжээ өндөр байлгах орон байр, агуулах савныхаа хаалга цонхыг найдвартай цоож бусад хамгаалалтаар бэхлэх, ялангуяа иргэд ажлаар болон амралтаар хол удаан хугацаагаар гэр орноо эзгүй орхих нөхцөлд найдвартай хүмүүст захиж үлдээх, өөрсдийн санаачлагаар байр сууцныхаа орц, давхарт байнгын сахиул жижүүр ажиллуулах, камерын хяналтын систем нэвтрүүлэх, мартагдсан боловч өнөө үед үгүйлэгдэх болсон хөршийн холбооны уламжлалыг сэргээх, бэлтгэгдэж байгаа гэмт хэрэг, хулгайлах гэмт хэрэг үйлдэгддэг, үйлдэж болох хүмүүсийн тухай, тухай бүрд цагдаагийн байгууллагад мэдэгдэж улмаар тэдний гэмт үйл ажиллагааг таслан зогсоох боломж олгох, хулгайлах гэмт хэргийн халдлагад өртсөн тохиолдолд иргэд цагдаагийн байгууллагад нэн даруй мэдэгдэж, гэмт этгээдийн ул мөрийг баллахгүй байх, гэмт хэрэг гарсан газрыг хамгаалах шаардлагатай.

Иргэн та эд хөрөнгөө алдаж, хохирсныхоо дараа Цагдаагийн байгууллагад хандахаасаа илүү аюулгүй байдлаа урьтаж хангах нь чухал бөгөөд амь нас, эрүүл мэнд, эд хөрөнгөө гэмт халдлагаас хамгаалахад ашиглаж болох дэвшилтэт техник, технологийг нэвтрүүлэх нь өмчлөх эрхийн эсрэг гэмт хэрэг үйлдэгдэхээс урьдчилан сэргийлж болох нэг арга зам юм.

Иргэн хулгайн гэмт хэргээс урьдчилан сэргийлэх талаар нутгийн захиргааны байгууллага, цагдаагийн байгууллагаас хэрэгжүүлж байгаа арга хэмжээг дэмжих, хулгайн гэмт хэргийн талаар олж мэдсэн зүйлээ холбогдох байгууллагад мэдээлэх үүрэгтэй.

Иргэд та бүхнийг гэмт хэргээс урьдчилан сэргийлэх үйл ажиллагаанд идэвхтэй оролцохыг уриалж байна. 
           

ЦАГДААГИЙН ЕРӨНХИЙ ГАЗРЫН УРЬДЧИЛАН СЭРГИЙЛЭХ ХЭЛТЭС