Германы элчин сайдын яам, Азийн хөгжлийн банк, Монгол Улсын Хөдөлмөр, нийгмийн хамгааллын яамтай хамтран хэрэгжүүлж буй "Build4Skills" буюу "Ур чадварыг бэхжүүлэх нь" төслийн нээлтийн үйл ажиллагаа өнөөдөр зохион байгуулагдлаа.

Талууд мэргэжлийн боловсрол, сургалтын салбарт хувь нэмрээ оруулахаар "Build4Skills" буюу "Ур чадварыг бэхжүүлэх нь" төслийг хамтран хэрэгжүүлэхээр болсон. Төсөл хэрэгжсэнээр ажлын байрны дадлага нь сургалтын хөтөлбөрийн 80 гаруй хувийг эзэлдэг Герман Улсын техникийн болон мэргэжлийн сургалтын системийн тогтолцоон дээр тулгуурлан Монгол оюутнуудыг дадлагажуулж, ажлын байран дахь гүйцэтгэлийг сайжруулан тэр хэрээр ажилтай орлоготой иргэдийг бий болгох нөхцөл бүрдэх юм.

Уг төслийн зорилго нь дэд бүтцийн төслүүдийн ажлын байрны дадлагыг сайжруулах явдал юм. Улаанбаатар хотод хотжилт болон дэд бүтцийн хөрөнгө оруулалт өсөх чиг хандлага нэмэгдэж, тэр хэрээр Монгол Улсад ур чадвартай барилгын ажилчид эрэлттэй байна.

Иймд төслийн зүгээс эхний ээлжинд АХБ-ны санхүүжилтээр хэрэгжиж буй "Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр"-ийн хүрээнд хийгдэж буй бүтээн байгуулалтын ажлууд дээр сургалтын үйл ажиллагаагаа хэрэгжүүлэх бөгөөд цаашид Монгол орон даяар илүү үйлдвэр дээрх дадлагын үйл ажиллагааг дэмжин ажиллаж, хэрэгжүүлэхийг зорьж байгаа юм.

Тиймээс уг төслийн төлөөлөл төсөл хэрэгжиж эхлэх "Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр"-ийн хүрээнд 2018 онд хийж гүйцэтгэсэн бүтээн байгуулалтууд болон одоо хэрэгжиж буй бусад ажлуудын талбараар зочилсон юм.

Зочдыг "Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр"-ийн зохицуулагч Д.Авирмэд хүлээн авч хөтөлбөрийн хүрээнд хийж буй ажлууд болон хүрэх үр дүнгийн талаар танилцуулан цаашид хөтөлбөрийн хүрээнд хийх ажлууд их бөгөөд "Build4Skills" буюу "Ур чадварыг бэхжүүлэх нь" төсөл шаардлагатай үедээ хамтран ажиллахаар хэрэгжиж эхэлсэнд талархалтай байгаагаа илэрхийлж Улс орны хувьд хамгийн үнэ цэнэтэй нөөц бол ур чадвартай хүний нөөц, мэргэшсэн ажилтан, хийж бүтээх чин сэтгэл байдаг хэмээн тодорхойлж,  төслийн хамт олонд ажлын амжилт хүслээ.