Нийслэлийн удирдах ажилтны шуурхай зөвлөгөөнөөр Хан-Уул дүүрэг, Зайсан дахь KFC салбарт гарсан хордлогын талаар авч хэлэлцжээ. Тус сүлжээ ресторанд хийсэн Мэргэжлийн хяналтын шалгалтын дүнг танилцуулсан байна.Уг шалгалтаар KFC сүлжээ рестораны ахуйн хэрэгцээнд хэрэглэдэг худгийн уснаас өвчин үүсгэгч нян илэрсэн, улмаар хоёр ажилтан эрүүл мэндийн үзлэгт хамрагдахдаа нян тээсэн гэсэн оноштой байсан боловч ажилд орохын тулд эмчийн дүгнэлтийг хуурамчаар үйлдүүлэн ажилд орсон зэрэг зөрчил илэрсэн аж.
Ингэснээр Улаанбаатар хот дахь KFC сүлжээ рестроны бүх салбарыг хааж, бүтээгдэхүүний дээжид нь шалгалт хийхээр болсон байна. Ингээд НМХГ-ын дарга Л.Эрдэнэчулуун шуурхай зөвлөгөөн дээр дараах мэдээллийг өгчээ.
Тэрбээр “Манай газарт энэ сарын 11-ний өдөр дуудлага ирж, 12-ний өдөр “Зайсан KFC” түргэн хоолны газрыг хаасан байгаа. Тус газарт хоёрдугаар сарын 8-15-ны өдрүүдэд хоол идсэн 116 хүнд ойр ойрхон усархаг гүйлгэх, зарим хүнд бөөлжих, халуурах зэрэг эмнэлзүйн ижил шинж тэмдэг илэрч ХӨСҮТ-д хэвтэн эмчлүүлж байгаа 37, гэрээр эмчийн зөвлөгөөний дагуу эмчлүүлж байгаа 79 хүнд хоолны хордлогот халдварын ижил эмнэлзүйн шинж тэмдэг илэрсэн. Манайхаас хяналт шалгалт хийж, 39 төрлийн хоолны дээж, 41 нэр төрлийн хүнсний түүхий эд бүтээгдэхүүн, ундны усны 2, агаарын 5 сорьц, 4 ундааны сорьц авч лабораторид нян судлалын шинжилгээнд хамруулсан. Мөн тус түргэн хоолны газрын нийт 28 ажиллагсдаас ХӨСҮТ-ийн тархвар судлаач эмч, лаборант нар тухайн ажлын байранд байрлан эрүүл мэндийн үзлэг хийж, нян тээгч илрүүлэх шулуун гэдэсний арчдасын сорьц авч шинжилгээнд хамруулаад байна. Шинжилгээний хариу гарсан. Ус болон бүтээгдэхүүнээс өвчин үүсгэгч илэрсэн. Мөн тус байгууллагын хоёр ажилтан цусан суулга өвчний халдвартай байсан нь илэрсэн. Эрүүл мэндийн үзлэгийн хуудсыг хуурамчаар үйлдсэн байсан. Өнөөдрөөс тус түргэн хоолны газрын бүх салбарыг хаахаар болсон. Мөн бүтээгдэхүүнийг устгах ажиллагаа явагдах болно” хэмээлээ.
