УИХ-ын гишүүн, Барилга, хот байгуулалтын сайд Х.Баделхан, Төрийн нарийн бичгийн дарга С.Магнайсүрэн болон яамны газрын удирдлагууд өнөөдөр ШУТИС-ийн Барилга архитектурын сургуульд ажиллаж, сургуулийн үйл ажиллагаатай танилцлаа.
Энэ үеэр тэрээр Нийслэлийн төв цэвэрлэх байгууламж болон аймгуудад барьж буй цэвэрлэх байгууламжийн ажлын явцыг танилцууллаа.
Тодруулбал, БНХАУ-ын хөнгөлөлттэй зээлээр нийслэлийн Төв цэвэрлэх байгууламжийн хүчин чадлыг өргөнө. Мөн АХБ-ны санхүүжилтээр хэд хэдэн аймгийн төвд цэвэрлэх байгууламж барихаар болжээ. Ингэснээр гурван жилийн дараа манай улсын хүн ам төвлөрсөн томоохон суурингуудын цэвэрлэх байгууламж бүрэн шинэчлэгдэж дуусах учраас эдгээрт ажиллах мэргэжлийн хүмүүсийг ШУТИС одооноос бэлтгэх, шинэ анги нээх шаардлага байгааг Х.Баделхан сайд онцлов.
Мөн тэрээр 60 жилийн турш хуримтлагдсан төв цэвэрлэх байгууламжийн лагаас улбаатай өмхий үнэрийг энэ хавар бүрэн дарна гэсэн юм.
ШУТИС-ийн Барилга архитектурын сургууль нь Барилгын инженер, Архитектур, Хүрээлэн буй орчин гэсэн 3 чиглэлээр бакалаврт 3083, магистрт 110, докторын зэрэгт 18, нийт 3211 оюутан, суралцагчидтай, профессор, багш ажилтан 166 хүний орон тоогоор сургалтын үйл ажиллагааг зохион байгуулж байна. Нийт багш нарын 35.0 хувь нь эрдмийн цол, зэрэгтэй багш нар байна.
Барилга, Архитектурын Сургууль нь 2012 оноос эхлэн “Барилгын инженер", "Хүрээлэн буй орчны инженер”, “Архитектур" гэсэн 3 багц хөтөлбөрөөр оюутан элсүүлэн суралцуулж байна. Түүнчлэн Барилгын инженер, Автозамын барилгын инженер мэргэжлээр эчнээ ангийн сургалтыг хийж байгаа аж.
