МУСТА, дуучин Э.Чулуунчимэгийн “Бүсгүй ертөнц” тоглолт 2019 оны 02-р сарын 22-ны 19 цагаас UB palace-ын концертын их танхимд болох гэж байгаа. Хоёр жилийн өмнө тоглосон “Зүгээр л инээмсэглэ” тоглолтоосоо хойш хийсэн уран бүтээлүүд болон үзэгчдийнхээ сонсох дуртай 20 гаруй дуугаа эгшиглүүлэх уг тоглолтын тасалбар эрэлт ихтэй байна.
Олон олон бүсгүйчүүдийн дотоод сэтгэлийн дуу хоолойг уянгалаг сайхан дуунуудаараа илэрхийлж буй дуучин бүсгүй “Бүсгүй ертөнц“ цомгийн баяраа өнгөрөгч амралтын өдрөөр хийн, фэнүүдтэйгээ уулзсан юм. Дуучин бүсгүйтэй зургаа авахуулах, гарын үсэг зуруулах гэсэн олны хөл хэсэгтээ л татраагүй. Цомгийн баярын үеэр “Э.Чулуунчимэгийн дууг хэн сайн дуулах вэ“ уралдаан болж, арван бүсгүй өрсөлдсөн нь уулзалтыг улам сонирхолтой, хөгжилтэй болгоно лээ. Хоёр жилийн өмнө “Зүгээр л инээмсэглэ“ дуу нь хитийг тэргүүлж байсан бол энэ удаад охин Б.Аялгуутайгаа хамтран дуулсан “Хамгийн гоё хайр“ дуу хит-д дээгүүр давхиж байна.
