ШШГЕГ-ын 461 дүгээр ангид саатуулагдсан хуульч эмэгтэй нас барсан хэргийн талаар хуульчдын төлөөлөл өнөөдөр (2019.02.27) мэдээлэл хийлээ. Тэд ХЗДХ-ийн сайд Ц.Нямдоржийг огцрохыг шаардлаа. Учир нь төрийн тусгай хамгаалалттай газруудад удаа дараа гэмт хэрэг гарч, хүний амь эрсдэж байхад хуульзүйн сайд Ц.Нямдорж нэг удаа дуугарсангүй. Ард түмнээс уучлал гуйгаагүй, шалтгаан нөхцөлийг тайлбарлаагүй учраас түүнийг огцрохыг шаардав.
Тэрээр Хуульч Д.Оросоо “ШШГЕГ-ын цагдан хорих 461 дүгээр ангид хуульч эмэгтэй амь насаа алдсан уг хэрэг нь төрийн тусгай хамгаалалттай газар, төрийн байгууллагад амь насаа алдаж байгаа анхны тохиолдол биш гэдгийг онцолж хэлмээр байна. Төрийн хамгаалалттай, төрийн обьёоктод төрийн албан хаагч удаа дараа амь насаа алдаж байна. Зам тээврийн хөгжлийн яаманд удирдах албан тушаал хашдаг байсан хуульч бусдын гарт хэрцгийгээр амь насаа алдсан байсан. Нийслэлийн Дүүргийн ЗДТГ-ын удирдах ажилтан бусдад хутгалуулж гэмтэл авч байсан. Увс аймгийн хилийн 0311 дүгээр ангийн байлдагч амь насаа хорлосон гэх хэрэг гарсан. Дорноговийн Зүүнбаянгийн Цэргийн ангиын байлдагч бусдын үйлдлийн улмаас амь насаа алдсан байж болзошгүй хэрэг үүсээд шалгагдаж байна. Энэ мэт хэргээс харахад цуврал гэмт хэрэг шиг гэмт хэрэг Монгол улсад гарч байна. Энэ нь монгол улсын үндсэн хуулийн эрүүл аюулгүй орчинд амьдрах эрхийг ноцтой зөрчиж байна. Монголын төр иргэнийхээ үндсэн эрхийг хамгаалж чадахгүй террорист шиг болчихлоо.
Хүний амьд явах эрх бол монгол улсын тусгаар тогтнол аюулгүй байдын үндэс байна гээд заагаад өгсөн байдаг. Тиймээс бид Үндэсний аюулгүй байлдын зөвлөлд хандаж хүний амьд явах эрх, ялангуяа төрийн байгууллагад алба хашиж байгаа хүн төрийн байгууллагад гэм буруугаа шалгуулахаар очиж байгаа хүний амь нас эрсдээд байгаа энэ асуудалд Үндэсний аюулгүй байдлын зөвлөл анхаарлаа хандуулж, яаралтай хуралдаж, зөвлөмж гаргаач ээ гэсэн байр суурьтай байна. Үүнийгээ бид албан ёсоор сонордуулга, уриалга байдлаар хүргэх болно.
Хууль зүй дотоод хэргийн салбарт ийм хэргүүд их гарч байна. Гэтэл ХЗДХ-ийн сайд энэ талаар ямар ч үг хэлсэнгүй, байр сууриа илэрхийлсэнгүй. Монгол улсад гарч байгаа энэ гэмт хэрэгтэй тэмцэх, эрүүл аюулгүй орчинд амьдрах, амьд явах эрхийг хангах чиглэлээр хангалттай ажил хийж чадахгүй байна гэж харж байна” гэв.
Хуульч н.Болормаа “Монгол улсын засгийн газрын гишүүн ХЗДХ сайд Ц.Нямдорж төрийн байгууллагад онцгой обьёктод очиж амь насаа алдаад байгаа хүмүүсийн төлөө огцрохыг шаардаж байна. Амь насаа алдсан иргэд амь насаараа хохирч байхад ар гэр нь давхар, давхар хохирч эрх нь зөрчигдөж байхад энэ асуудалд ХЗДХ-ийн сайд яагаад мэдээлэл хийхгүй, ард иргэдээсээ уучлал хүсэхгүй байгаа. Яагаад шалтгаан нөхцлийг тодруулахаар хяналт тавьж ажилдаггүй юм бэ? Сүүлд гарсан хэрэгт холбогдуулан хэлэхэд цагдан хорихдоо ар гэрийнхэнд нь мэдэгдэлгүй хорьсон. Нас барснаас 7 цагийн дараа ар гэрийнхэнд нь мэдэгдсэн энэ үйлдлүүддээ яагаад тайлбар хийж, мэдээлэл хийхгүй байгаа юм бэ?
Энэ хэргүүдэд хяналт тавьж ажиллахгүй байна. Тиймээс ХЗДХ-ийн сайд Ц.Нямдоржийг огцрохыг шаардаж байна. Баривчлах саатуулах, цагдан хорих арга хэмжээг амьд явах халдашгүй байх эрхийн үүднээс энэ хуулиа илүү боловсронгуй болгох шаардлагатайг онцолж байна” гэлээ.
