Хотын даргаар сонгогдсон С.Амарсайханг Монгол Улсын Ерөнхий сайд У.Хүрэлсүх өнөөдөр батламжилах шийдвэр гаргажээ. Ингээд дөнгөж сая буюу 18.30 цагт Нийслэл захирагч бөгөөд Улаанбаатар хотын даргаар шинээр сонгогдсон С.Амарсайхан үүрэгт ажлаа хүлээж авлаа.
Хотын даргын ажил хүлээлцэх ажиллагаанд ЗГХЭГ-ын дарга Л.Оюун-Эрдэнэ оролцож шинээр сонгогдсон хотын дарга С.Амарсайханд ажлын амжилт хүсч, цаашид хуулийн хүрээнд нийслэл хотынхоо иргэдийн эрх ашиг хангаж ажиллаарай гэж захилаа.
Харин ажлаа хүлээж авсан хотын шинэ дарга С.Амарсайхан хэвлэлийнхэнд хандаж "Эхний ээлжинд хийх ажлыг холоос хайхгүй. Нийслэлийн иргэд бүгд мэдэж байгаа. Агаар, хөрсний бохирдол, замын түгжрэл, хотын түгжрэл гэх зэрэг олон асуудлууд байгаа учраас ажлыг эхнээс нь хийгээд явна. Хамгийн түрүүнд хийж болох үр дүнд хүрэх боломжтой ажлуудыг эхлүүлнэ. Мөн хариуцлагаас бүх ажлыг эхлүүлнэ. Гэхдээ хариуцлагыг шаардаж байна гээд алваа туйлшрал руу явахгүй. Нийслэл шат шатны байгууллагууд оновчтой, хариуцлага тооцох боломжтой бүтэц, зохион байгуулалтыг хийнэ. Бүтэц, зохион байгуулалт хийж байна гээд ямар нэгэн халаа сэлгээг туйлшруулахгүй. Миний бие нийслэлийн засаг дарга болсноор бүх асуудлыг газар дээр нь шийднэ гэж хэлэхгүй. Тооцоо судалгаа, ухаалаг шийдэл дээр тулгуурлаад иргэд олон нийтийнхээ аюулгүй байдлыг хангах тал дээр зөв зохистой бодлого барьж ажиллана. Хуулийн хүрээнд хотын шинэчлэлийг өрнүүлж, шинэ дэвшилтэд арга замуудыг сонгож ажиллана. Бүх зүйл хуулийн дагуу байх ёстой. Ингэж байж бид бүхний хүсдэг хот бий болно. Энэ чиглэлд бид иргэдийнхээ идэвхи оролцоог илүү хангаж ажиллана" гэлээ.
