Авлигатай тэмцэх газарт мөрдөгдөж дуусдаггүй хэргүүд гэж уул овоо шиг юм овоороод байгаа ажээ. Онцгой байдлын ерөнхий газрын дарга нар болон Батлан хамгаалах яамны зарим томоохон албан тушаалтнуудын хэргүүд бараг гурав дөрвөн жил тэнд дарагдаж байна. Харин ойрноос тэдгээр хэргүүдээс 2015-2016 онд Батлан хамгаалах яамны Төрийн нарийн бичгийн даргаар ажиллаж байсан хурандаа Б.Батсайхан болон түүний хамсаатнуудын хэргийг Сонгинохайрхан дүүргийн эрүүгийн анхан шатны шүүхээр арай ядан шийдэх гээд дуншиж байгаа аж. Хурандаа Б.Батсайханыг мөрдөгч, прокурорууд нь эрх мэдлээ урвуулан ашигласан хэмээн буруутгаж, өнгөрсөн оны намар тус шүүх рүү шилжүүлсэн боловч өмгөөлөгч нар нь элдэв янзын арга саам хэрэглэн шүүх хурлыг хойшлүүлсаар өдий хүрчээ. Б.Батсайхан нь анх Д.Дорлигжавыг Батлан хамгаалахын сайдаар томилогдон очиход Зүүнбаянгийн цэргийн ангиас суга дэвшин зөвлөхөөр нь ажиллан ахмадаас шууд хурандаа цолтой болж мандан бадарч явсан юм. Тэгээд дараа нь Д.Дорлигжавынхаа дэмжлэгээр Өмнөд Солонгосын цэргийн академид суралцсан боловч харамсалтай нь төгсөж ирээд яамандаа дэд сайд юм уу, эсвэл Төрийн нарийн бичгийн даргаас өөр ажил хийхгүй гэж томроод, сүүлдээ хүсэл шуналыг нь хөдөлгөсөн ийм том суудал олдохгүй болохоор нь цэргээс халагдаж, Ерөнхий сайд асан Ч.Сайханбилэгийн дэргэд очоод, хар бор хамаг ажлыг нь амжуулж явсаар 2015 оны намар мань эрийн татаас хуйвалдаанаар генерал цолтой З.Болбаатарыг зайлуулан оронд нь Батлан хамгаалах яамны Төрийн нарийн бичгийн даргын зөөлөн сэнтийд заларсан байлаа. Гэвч хурандаа Б.Батсайхан нь Төрийн нарийн бичгийн дарга гэдэг энэхүү хариуцлагатай өндөр албанд томилогдсон өдрөөсөө эхлэн Батлан хамгаалах яамныхаа төсвийн хөрөнгө мөнгө рүү хуруу хумсаа зоож эхэлжээ. Түүний хувьд ердөө л авч идэх шуналаа гүйцээхийн тулд тус албыг эртнээс мөрөөдөн Ч.Сайханбилэгийг бараадаж явсан юмсанж. Тэгээд Төрийн нарийн бичгийн даргын албан тушаалаа ашиглан эхнэрийнхээ Тэрэлж дэх амралтын газар, аялал жуулчлалын компанийг Батлан хамгаалах яамнаас санхүүжүүлэх зэргээр туйлж өгчээ. Тухайлбал, эхнэрийнхээ тэрхүү амралтын газарт засвар хийлгэх нэрээр тус яамны санхүүгээс 109.4 сая төгрөг дур мэдэн шилжүүлсэн байв. Мөн эхнэрийнхээ аялал жуулчлалын компаниар дамжуулан БХЯ-аас зарласан хэд хэдэн тендерийн мөнгийг авч завшсан байна. Гэвч түүний шунал үүгээр зогссонгүй. БХЯ-ны харъяа “Дуулга” студийн байрны засвар, Офицерүүдийн ордны “Соёмбо” танхимыг шинэчлэх, Батлан хамгаалахын их сургуулийг тохижуулах гэх зэргээр цаашаа хөвөрч өгсөн байх юм. Хурандаа Б.Батсайханы эдгээр хэргүүдэд хамтрагчаар оролцож хөлд нь чирэгдсэн хэд хэдэн хүн одоо хуйхаа маажин, дээшээ тэнгэр хол, доошоо газар хатуу гэгчээр орох газраа олж ядан гудамж хэмжээд явж байгаа аж. Жишээлэхэд, Барилгын цэргийн 017, Орхон аймаг дахь барилгын цэргийн 110 дугаар ангийн захирагчаар ажиллаж байгаад тэтгэвэртээ гарсан бэлтгэл хурандаа Л.Балдан-Очир болон иргэн Г.Сугар нар нь хам хэрэгт ялагдагчаар татагдан Сонгинохайрхан дүүргийн эрүүгийн анхан шатны шүүхийн үүдийг сахиад сууж байна. Б.Батсайханыг олон жил дэргэдээ авч ивээн тэтгэж байсан Ерөнхий сайд асан Ч.Сайханбилэг нь Дубайн луйврын гэрээ, авлига хээл хахуулиар бас мөрдөгдөж байгаа билээ. Ороо нь ороогоороо, жороо жороогоороо гэгчээр тэд анхнаасаа л албан тушаалаа ашиглан хууль бусаар хөрөнгөжиж, авлигаар угжуулахын төлөө хамтарч ажиллаж байсан нь энэ бүхнээс одоо илэрхий болоод байна. Хурандаа Б.Батсайхан нь мөрдөн шалгах ажиллагааны үеэр мөрдөгчдийг элдэв янзаар аргалаад өнгөрөх санаатай хэргийг сунжруулж байсан бол сүүлдээ шүүхэд нөлөөлөх гээд шүүх хурлыг удаа дараа хойшлуулж байгаа ажээ.
О.Баяр
Шуурхай.мн
