Сангийн Яамнаас төрийн сангуудад хийсэн шалгалтын дүнгүүдийг олон нийтэд нээлттэй болгоод байна. Үүнд Боловсролын Зээлийн Сангаас зээл авч гадаадад сураад сураггүй болсон хүмүүсийн дунд УИХ-ын гишүүн Лу.Болдын анхны эхнэр болох Чулуунтулгын Туяа нь 1997 онд Английн Абердины Их сургуульд сурахаар 71,730 ам долларын зээл авч байжээ. Уг зээлээ 2000-2003 онд төлөх ёстой байсан боловч өнөөг хүртэл 22 жилийн хугацаа өнгөрөхөд нэг ч төлөлт хийгдээгүй талаар сангийн яамны цахим хаягаас харж болно. Одоо Ч.Энхтуяа нь Английн Лондон хотод өөриййн гэсэн гоо сайхан, мэс заслын эмнэлэгтэй бөгөөд тэндээ суурьшсан гэх мэдээлэл байна.
Боловсролын Зээлийн Сангаас зээл олгохдоо гэрээнд заасан байгууллагад 5-иас доошгүй жил ажилласан тохиолдолд чөлөөлөх асуудлыг Сургалтын төрийн сангийн удирдах зөвлөлд хүсэлт гарган шийдвэрлүүлнэ. Гэрээний үүргээ зөрчсөн тохиолдолд 3 жилийн дотор төлж барагдуулна гэж заасан байдаг байна.
Бид энэ сэдвийг хөнддөг гол учир нь жирийн иргэний сурлагатай хүүхдүүдийн өмнүүр нөлөө бүхий хүмүүсийн ар гэр, үр хүүхэд, хамаатан садан нь урдуур нь орж татвар төлөгчдийн мөнгөөр гадаадын их, дээд сургуульд сураад зогсохгүй, зээлээ эргэн төлөхгүй өчнөөн олон жил болсон байх юм. Энэ мэтчилэн жирийн иргэдийн татвар төлсөн мөнгөөр улс төрч, олны танил эрхмүүдийн ар гэр, хамаатан садан өндөр хөгжилтэй оронд суралцаж, тэндээ суурьшиж байгаа нь шудрага бус үйлдэл юм.
Дашрамд сонирхуулахад БСШУСЯ-ны “Боловсролын зээлийн сан” (БЗС) нь 1993 онд “Сургалтын төрийн сан” нэртэйгээр байгуулагдсан. Дотоодын болон гадаадын дээд боловсролын сургалтын байгууллагад суралцагчдад олгосон зээлээс 2017 оны жилийн эцсийн байдлаар нийтдээ 150.2 тэрбум төгрөгийн үлдэгдэлтэй болжээ.
Эх сурвалж: Монгол Улсын САНГИЙН ЯАМ
