Өчигдөр Худалдаа хөгжлийн банкны удирдлагуудыг цагдан хорьсноос үүдэж тус банк дампуурах нь гэх мэдээлэл тараад байгаа билээ. Үүнээс болж тус банкны зарим харилцагчид яаравчлан хадгаламж, харилцахын мөнгөө татаж эхэлсэн мэдээлэл гэрлийн хурдаар тарж Төв банкны хэвлэлийн ажилтан өөрийн цахим хуудсаараа дамжуулан банк хэвийн үйл ажиллагаа явуулж байгаа гэх мэдээллийг байршуулсан байв. Ер нь яагаад тус банк ийм байдалд оров гэдгийг хүн бүхэн мэдэж буй. Мэдээж дээрх банк Эрдэнэт үйлдвэрийн 49 хувийг төрийн мөнгөөр худалдаж авсан гэх асуудлаас үүдэлтэй. Уг нь 49 хувийнхан бид өөрсдийн хөрөнгөөр худалдаж авсан хэмээн олонтаа хашхирсан ч аль хэдийний ХХБ-ийг дампууруулах төрийн машин ажиллаад эхэлчихлээ хэмээн зарим улстөрчид үзэж буй юм.

Тухайлбал,”Эрдэнэт” үйлдвэрийн 49 хувийн асуудлыг сөхсөн цагаас хойш “Монголын зэс” гэдэг корпорацийн нэр тийм ч хүчтэй дуулдаагүй өнөөг хүрсэн. Харин Худалдаа хөгжлийн банк ба эсэргүүцсэн улстөрчид гэсэн хоёр тал хүчтэй үзэлцэж чи, би дээ тулж “Эрдэнэт”-ийн 49 хувийг төр авах ёстой гэсэн улстөрчдийн салхийг анх хагалсан хүн нь Ц.Нямдорж гишүүн. Тэрбээр Худалдаа хөгжлийн банкыг Ч.Сайханбилэгийн Засгийн газартай хуйвалдаж, Монголбанкны ерөнхийлөгч асан Н.Золжаргалаар мөнгө хэвлүүлэн байж уулын баяжуулах үйлдвэрийн 49 хувийг худалдаж авсан гэх мэдээллийг цацаж ард түмний ой санамжид үлдээсэн. Тэгвэл үнэхээр Худалдаа Хөгжлийн банкийг Эрдэнэтийн 49 хувиас болж дампууруулах сэдэл, зорилго байна уу гэж харагдахад хүргэж байна. Учир нь манай улстөрчдөд Анод, Зоос, Хадгаламж, Монгол шуудан гээд хэвийн ажиллаж байсан банкуудыг хүчээр дампууруулж байсан арвин туршлага маш их бий. Өөрөөр хэлбэл, тэд тухайн байгаа онохын тулд эхлээд үндэслэлгүй сөрөг мэдээллүүдийг цацаж банкуудын хэвийн үйл ажиллагааг доголдуулах, улмаар нийт банкны системийн аюулгүй байдалд заналхийлдэг. Ямартай ч иймэрхүү сөрөг үр дагавараас үүдэж Монгол Улсад санхүүгийн хямрал нүүрлэхийг ч үгүйсгэхгүй. Тиймээс л өчигдөр ХХБ-ны зүгээс яаран сандран хариу мэдэгдэл хийж нэр хүндээ хамгаалахыг оролдсон юм. 
Хэрвээ уншигчид санаж буй бол Ерөнхийлөгчийн сонгуулийн дараа “Худалдаа хөгжлийн банк дампуурлаа зарлана" гэх мэдээлэл цахим сүлжээнд тарж Сангийн сайд асан Б.Чойжилсүрэн хариу мэдэгдэл хийснээр энэ яриа дарагдаж байв. Тэгвэл одоо Эрдэнэтийн 49 хувиас үүдэж ХХБ төрийн махны машинд хэрчигдэж дампуурах уу эс дампуурах уу гэдэг хүндхэн сорилтын өмнө ирээд байна.

Эх сурвалж: Erennews.mn