Албан тушаалын төлөөх дайн цаг ямагт л үргэлжилж байгаагийн нэг нь Эрүүл мэндийн хөгжлийн төвийн дарга Б.Нарантуяагийн тухайд дэгдээд буй мэдээлэл. Түүнийг бусдаас авлига авсан хэргээр АТГ-аас шалгасан төдийгүй баривчлан саатуулсан гэх мэдээлэл гарсан. Харин Б.Нарантуяа даргын хувьд энэхүү мэдээллийг эрс няцааж буй. Харин салбарын сайд нь энэхүү асуудалтай холбоотойгоор мэдээлэл хийж, Б.Нарантуяаг чөлөөлнө гэдгээ хэллээ. Тэрбээр

'Сүүлийн үед манай эрүүл мэндийн салбартай холбоотой хоёр асуудал хэвлэлээр олон хөндөгдөж байна. Уг нь өнөөдөр нэг хүний албан тушаал ярьж байхын оронд дэгдээд байгаа томуу, эмнэлгийн орны асуудал яривал сайн юмсан. Эрүүл мэндийн хөгжлийн төвийн даргын албан тушаал надад хэрэггүй. Би УИХ-ын гишүүн, Эрүүл мэндийн сайдын ажилдаа сэтгэл хангалуун байгаа. Эрүүл мэндийн хөгжлийн төвийн дарга Б.Нарантуяа гэдэг түр орлон гүйцэтгэгчийн асуудлыг би ярьж байна. Ярихад ичгэвтэр боловч өнгөрсөн Засгийн газрын үед энэ газрын даргын ажлыг Б.Нарантуяа булааж авсан юм байна лээ. Өмнөх хүн нь асуудал тавьж, сонин хэвлэлээр бичүүлж байгаа гэсэн яриа гарсан байна лээ. Эрүүл мэндийн салбартай холбоотой асуудал учраас би тодруулсан. Б.Нарантуяа Эрүүл мэндийн хөгжлийн төвийн даргын суудлыг авахдаа өмнөх даргыг нь дэд дарга болгоно гэчихээд тавиагүйгээс болоод өш зангидаад байна гэдэг мэдээллийг өгсөн. Би тэр Б.Нарантуяагийн шоронд орсон эсэх асуудлыг мэдэхгүй. Эрүүл мэндийн хөгжлийн төв нь яамны Төрийн захиргаа, удирдлагын газарт харьяалагддаг. Гэхдээ сургалтаа зохион байгуулж чадахгүй, гадаад руу явах эмчээр өөрийн хамаатан саднаа явуулсан гэх асуудал байна. Тэгэхээр Б.Нарантуяаг албан тушаалаас нь чөлөөлөх нөхцөл бүрдсэн гэж үзэж байгаа. Чөлөөлнө” гэсэн юм.

Харин энэ үеэр УИХ-ын гишүүн Ж.Мөнхбат “Ажлаа хийж байгаа хүний ажлыг нь булааж авахын тул “Г.Өсөхбаяр аваргын гэргий, Эрүүл мэндийн хөгжлийн төвийн дарга Б.Нарантуяа шоронд оржээ” гэдэг мэдээллийг зохион байгуулалттайгаар тараасан. Ажлаа хийж яваа хүнийг зүгээр байхад нь ингэж гүтгээд нэр хүндэд нь халдаж байгаагийн зорилго нь ажлыг нь булаах. Үүний тулд тухайн салбарынхан нь зохион байгуулалттайгаар ажиллаж байна. Үүний ард тухайн хүн болон гэр бүл, байгууллагынх нь нэр хүнд хохирч байна. Иймэрхүү увайгүй, зарчимгүй үйлдэл гаргасан хүмүүстэй Засгийн газар хариуцлага тооцдог стандарттай болох хэрэгтэй. Энэ бүхнийг зохион байгуулсан хүмүүс Г.Өсөхбаяр аваргын гэргийгээс уучлалт гуйх ёстой. Би “Бөх билэгт” дэвжээний тэргүүний хувьд үүнийг хэлье гэж бодсон юм” хэмээн аваргын гэргийг өмөөрөв.  

Д.Болд

Шуурхай.мн