Ж.Батзандангийн цоллосноор “улстөр дэх мафийн бүлэглэлийн гар хөл болдог”, мөнхүү “улстөрчдийг бөлдөгдсөн”, “Ц.Элбэгдоржийн дохио зангаагаар улстөрчдийг хэлмэгдүүлдэг” гэх Б.Хурцыг БНСУ-д Элчин сайдаар томилсон асуудал ид хурцдаж байна. Гэтэл нөгөө талд нэр бүхий хүмүүсийг Элчин сайдад томилох асуудал хоёр Ерөнхийлөгчийн нүүр үзэн шийдэгдээгүй байгаа нь ихээхэн сонирхол татна. Үүнээс харвал Ц.Элбэгдоржийн үед УИХ-аас 90-100 хувийн саналаар дэмжигдсэн Ё.Отгонбаяр, Г.Тэнгэр, Н.Чимгүүндарь нарыг Элчин сайдаар өнөөдрийг болтол томилоогүй. Гэтэл Х.Баттулга Ерөнхийлөгч болсоор бас л чамгүй хугацаа өнгөрсөн ч томилоогүй байна. Харин эх сурвалжийн хэлж байгаагаар эдгээр Элчин сайдад горилогчдыг ганцхан Б.Хурцын асуудлаар чөдөрлөн барьцаалж байгаа гэх.
Өнөөдөр хэл амтай ч гэсэн Б.Хурц Элчин сайдад дэмжигдсэн байгаа нь дээрх гурван нөхрийг Элчин сайдад Х.Баттулга зөвшөөрөх магадлалтай болж байна. Б.Хурцын хувьд төрийн алтан аргамж болсон диполмат албыг гацааж хэдэн сарын нүүр үзэхийг бодоход үнэхээр л Ж.Батзандангийн хэлсэн нь үнэн болж таарах нь. Тодотгож хэлбэл, хоёр Ерөнхийлөгч дамжин гацаж байгаа эдгээр нөхдийг Б.Хурцын томилгоогоор барьцаалсан гэж ойлгогдож байна. Нөгөө талаас Ерөнхий сайд У.Хүрэлсүх Б.Хурцыг “олон жил их ажилтай байлаа, одоо БНСУ-д очиж хэдэн жил сайхан амар” хэмээсэн нь ч Х.Баттулга нарын хоршил мөн гэж ойлгогдохоор. Уг нь Элчин сайдын албанд аяны дөрөө авахаар зэхэж буй Ё.Отгонбаяр, Г.Тэнгэр, Н.Чимгүүндарь нар нь диполмат албаны боловсролтой, ажлын дадлага туршлага арвин гээд гацаад байх зүйлгүй. Б.Хурцын дэргэд бол энэ албандаа төгс гэж болохоор хүмүүс. Гагцхүү нам дундын бүлэглэлийн золиос болчихоод байгаа хэрэг. Тэр тусмаа Ц.Элбэгдоржийн улстөрд үүрлүүлсэн бүлэглэлийн золиос болж байгааг эндээс харж болно.
Гүйцэтгэх засаглалын тэргүүн маань Монгол Улсыг харьд төлөөлөх Элчин сайдыгаа гадаадад хэдэн жил амарч байгаад ирэхгүй юу хэмээн царайчилж суугаагаас харвал Б.Хурц үнэхээр л “улстөрчдийг бөлдөгдсөн” нэгэн гэдгийг харж болно. Уг нь Монгол Улсыг харьд төлөөлөх Элчин сайд бол тодорхой шалгуур давсан, төрийн албан дадлага туршлагатай, ямар нэгэн гэмт хэрэгт оролцож байгаагүй хүн байх учиртай. Гэтэл олон улсын хил дамнуулан хүн хулгайлж байсан, бусдыг хилс хэрэгт хэлмэгдүүлж байсан нөхрөөр төлөөлүүлдэггүй юм.
Х.Баатар
Шуурхай.мн
