Шинэ жилийн баяраар амьсгалж буй эл өдрүүдэд бас нэгэн давхар баяр тохиосон нь нийслэл, дүүргийн тэргүүний 115 дугаар цэцэрлэгийн түүхт 30 жилийн ойн баярын арга хэмжээ, цэнгүүн байв. Баянзүрх дүүргийн тавдугаар хорооны нутаг дэвсгэрт 1987 оны намар цагт үүдээ нээж байсан тус цэцэрлэгийн “Гэгээн зүүд” нэртэй ёслол хүндэтгэлийн концерт, арга хэмжээ Тусгаар тогтнолын ордноо танхим дүүрэн үзэгчдийн халуун алга ташилтан дор болж өндөрлөлөө. “Гэгээн зүүд” концерт нь цэцэрлэгийн хүүхэд багачууд, багш нар, эцэг эхчүүдийн төлөөллөөс бүрдсэн нь нэгэн онцлог байв. Тодотгож хэлбэл, энэ хамт олон өөрсдийнхөө хүч хөдөлмөр, авьяас билгээр “Гэгээн зүүд”-ийг амилуулсан юм. Өнгөрөгч он жилүүдийн ололт амжилтаа дүгнэж, ирээдүйн төлөвлөгөөндөө гэрэл гэгээ тусгасан, үе үеийн багш албан хаагчдыг уулзуулсан, хөдөлмөр бүтээлээ үнэлүүлсэн уг арга хэмжээний салхийг хагалж, нийслэлийн шилдэг эрхлэгчдийн нэг Б.Гэрэлцэцэг туулсан цаг хугацааны ололт амжилтаа дүгнээд ирсэн зочдод халуун талархал илэрхийлсэн.
Хүндэтгэлийн арга хэмжээний хойморт тус цэцэрлэгийн анхны эрхлэгч Г.Цэндээхүү тэргүүтэй ахмад буурлууд хүрэлцэн ирсэн нь тэр чигээрээ тус цэцэрлэгийн амьд түүх болж байгаа нь бахархууштай. Мөн хүндэт зочдын суудалд Нийслэлийн Боловсролын газрын орлогч дарга Ц.Отгончимэг, дүүргийн Засаг даргын орлогч Д.Уламбаяр, дүүргийн Боловсролын хэлтсийн дарга М.Цогзолмаа, НЗДТГ, НИТХ-ын төлөөлөл, бусад хамтран ажилладаг байгууллагуудаас зочид заларсан нь энэхүү арга хэмжээ нь ямархан орон зайд болсныг төвөггүйхэн илтгэнэ. Өдгөө 50 гаруй багш, ажилтан, 700 шахам хүүхэдтэй үйл ажиллагаа явуулж байгаа 115 дугаар цэцэрлэгийн үе үеийн алба хаагч нарт шагнал гардуулах ёслолын ажиллагаа болсон.
Цэцэрлэгийн анхны эрхлэгч Г.Цэндээхүүг Төрийн дээд шагнал “Алтан гадас” одонгоор, нягтлан Г.Боловсон “Хөдөлмөрийн хүндэт медаль”-иар, ахмад багш Ш.Дэчмаа, Б.Түмэнжаргал, хөгжмийн багш Ц.Түвдэндорж нарыг “Боловсролын тэргүүний ажилтан” цол тэмдгээр, тогооч Б.Пунсалдуламыг “Худалдаа үйлдвэрлэл, үйлчилгээний тэргүүний ажилтан” цол тэмдгээр, Д.Цэцэгмааг БСШУСЯ-ны “Жуух бичиг”-ээр, Г.Баясгаланг Нийслэлийн боловсролын газрын “Багшийн алдар” тэмдгээр тус тус шагнасан юм. Мөн үеэр эрхлэгч Б.Гэрэлцэцэгийг НИТХ-ын Хүндэт тэмдгээр, 115 дугаар цэцэрлэгийг НИТХ-ын “Хүндэт өргөмжлөл”-өөр шагнасан. Баяр хүргэхээр ирсэн НИТХ, Баянзүрх дүүргийн ИТХ, ЗДТГ-ынхан ч ганзага хоосон ирсэнгүй. Тэдний шагналын богц задрахад Туслах багш Н.Пүрэвсүрэнг Засаг даргын нэрэмжит Баярын бичгээр, Биеийн тамирын багш Р.Очгэрэл, ахмад тогооч Д.Дарьсүрэн нарыг ИТХ-ын өргөмжлөлөөр шагнаж, дүүргийн Боловсролын газрын дарга М.Цогзолмаа байгууллагынхаа “Хүндэт өргөмжлөл” өнгөт принтерийн хамт тус цэцэрлэгт гардуулах үеэр хэлэхдээ “Манай Баянзүрх дүүргийн төдийгүй нийслэлийн тэргүүлэгч цэцэрлэгүүдийн нэг болох 115 дугаар цэцэрлэгийн сургалтын арга зүйн онцлог, бүтээн байгуулалтаараа бусдаас ялгарах давуу талтай. Байнга л шинийг сэдэж бүтээж хошуучилж явдаг хамт олон” гэдгийг онцлон дурдсан юм.
Түүнчлэн хамтарч ажилладаг “Отгонтэнгэр” их сургуулийн зүгээс нэг багшийг сургах 1.5 сая төгрөгийн эрхээр урамшуулсан. Харин Нийслэлийн Боловсролын газрын орлогч дарга Ц.Отгончимэг шагнал урамшууллынхаа ганзагыг буулгаж нэг багшийг англи хэлний сургалтад үнэ төлбөргүй хамруулах, хоёр багшийг гадаадын өндөр хөгжилтэй орнуудад аялах эрхийг гардуулсан. Тэрбээр нийслэлийн тэргүүний цэцэрлэгийг тодруулах ажлын хэсгийн ахлагчаар ажиллаж байсны хувьд 115 дугаар цэцэрлэгийг сайн мэдэх бөгөөд энэ хамт олон бол маш шаргуу хөдөлмөрчөөс гадна бусдаас ялгарах давуу тал олонтой ийм хамт олон шүү гэдгийг онцолсон.
Ийнхүү түүхэн ойгоо баяр хөөр дүүрэн тэмдэглэж буй хамт олны дунд шагналын хур бууж, түүний шилийг даран Батлах хамгаалах их сургуулийн дэргэдэх Үлээвэр найрал хөгжмийн хамт олон Төрийн дуулал эгшиглүүлснээр концерт эхэлсэн. Гэнэн томоогүй хүүхдүүдийн авьяас билгийг нэгэн дор зангидаж, энэхүү ордны тайзан дээр хурсан олонд дэлгэж үзүүлнэ гэдэг амаргүй ажил хэдий ч туршлагатай багш нар хүүхдээ сайтар бэлдэснийг тоглолтын уур амьсгалаас харж болно. Багш нарын хувьд хүүхдүүдээ бэлдээд зогсохгүй өөрсдийнхөө авьяас билгийг үзүүлэн дуулж бүжиглэж, хөгжимдөж, жүжиглэсэн нь олны талархалд нийцсэн үзүүлбэр болов. Үүний зэрэгцээ эцэг эхийн төлөөллөөс ч авьяас билгээ дэлгэн харуулсан нь тус цэцэрлэгийн багш эцэг эхчүүдийн уялдаа холбоог илтгэсэн явдал байв.
Тайзыг чимсэн нэг зүйл нь хүүхэд багачууд, эцэг эхчүүд, багш нарын төлөөлөл үндэсний хувцасаараа гоёж гарч ирсэн нь 115 дугаар цэцэрлэгийн үзэл баримтлал, тэдний нэгээхэн онцлогийг харуулна. Учир нь тэд ойн хүрээндээ “Монгол ёс заншлын өргөө”-г байгуулж, хүүхдийг монгол зан үйлд сургах, монгол хүн болгон төлөвшүүлдэг тийм зүй тогтолыг сургалтынхаа орчинд бий болгосон билээ. Дашрамд дурдахад 115 дугаар цэцэрлэгийн хамт олон “Сургалтын цөм хөтөлбөр”-ийг нийслэлд анхлан нэвтрүүлж хэрэгжүүлсэн цэцэрлэгүүдийн нэг учраас үзэл баримтлалдаа бусдаас урьтан өөрчлөлт хийсэн нь өдгөө сургалтын таатай орчинг бүрдүүлээд байгаа билээ. Энэхүү хөтөлбөрийг хэрэгжүүлэхд Ц.Даваацолмон, Н.Оюумаа, А.Нарантуяа, Ц.Цэндхүү нарын багш нар манлайлан оролцсон гэдгийг салбарынх нь дурдаж байсан. Ийнхүү шагнал урамшуулал, хөөр баяр дүүрэн тайзнаа амилуулсан “Гэгээн зүүд” тоглолтын дараа тус цэцэрлэгийн баримтат киног дэлгэн харуулсан. Тус хамт олон баримтат киноноос гадна “Ирээдүйд хөтөлсөн 30 жил” түүхэн баринтагт номыг уншигч олноо хүргэсэн билээ.
С.Ууганбаяр
Шуурхай.мн
