ЗГХЭГ-ын дарга Л.Оюун-Эрдэнэ Д.Энхжаргалыг “Оюутолгой”- н ТУЗ-ийн гишүүнээс чөлөөлүүлэх чиглэл хүргүүлжээ
"Оюу толгой" компанийн (ОТ) ТУЗ нийт 9 гишүүнтэй. Эдгээрийн гурван гишүүнийг Монголын талаас буюу Засгийн газраас томилдог юм. Одоо Г.Батсүх (ТУЗ-ийн дарга), Ц.Түмэнцогт, Д.Энхжаргал нар Монгол Улсыг төлөөлөн тус компанийн ТУЗ-ийн гишүүнээр ажиллаж байна. Ц.Түмэнцогт энэ оны хоёрдугаар сараас "Эрдэнэс Оюутолгой" компанийн захирлаар ажиллаж эхэлсэн тул автоматаар ТУЗ-ийн гишүүн болсон юм. Тус компани Монголын Засгийн газрын "Оюутолгой" дахь 34 хувийн эзэмшлийг төлөөлдөг юм.
Харин өнөөдөр ЗГХЭГ-ын дарга Л.Оюун-Эрдэнэ “Оюу толгой” компанийн ТУЗ-д Д.Энхжаргалыг гишүүнээс чөлөөлүүлэх чиглэл хүргүүлжээ. Одоогоор яагаад ийм шийдвэр гаргасан үндэслэл нь тодорхойгүй байна.
Д.Энхжаргал энэ албан тушаалыг 2018 оны аравдугаар сараас хойш хашиж байгаа юм. Эцсийн шийдийг тус компанийн ТУЗ шийднэ.
Д.Энхжаргал Монгол Улсын Төв банкинд 30 гаруй жил ажилласан. 2013-2018 он хүртэл Монгол Улс-Европын Холбооны хамтарсан төсөл, Дэлхийн банк, Азийн хөгжлийн банк, Азийн дэд бүтцийн хөрөнгө оруулалтын банкинд тус тус зөвлөхийн үүрэг гүйцэтгэсэн. Банк, санхүү, эдийн засгийн чиглэлээр мэргэшсэн бөгөөд хуучнаар ЗХУ-ын Үндэсний эдийн засгийн академи, АНУ-ын Вандербильт их сургуулийг төгсөж, Оксфордын их сургуульд мэргэжил дээшлүүлсэн.
“Эрдэнэс Монгол” ХХК-ийн ТУЗ-ийн хараат бус гишүүн, Европ дахь Монгол эмэгтэйчүүдийн хөгжлийн холбоо, Санхүү банкны эмэгтэйчүүд, Дэлхийн монгол эмэгтэйчүүд зэрэг байгууллагын ерөнхийлөгчөөр тус тус ажилладаг юм.
