Дэлхий нийтэд тархасан сүлжээний бизнес буурай орнуудад орж ирээд багагүй хугацааг өнгөрөөгөөд байна. Үнэн худал нь мэдэгдэхгүй олон сүлжээний бизнесийн дийлэнх нь луйврын замаар ажилладаг гэдгийг ч өдгөө эрх биш гадарлах болсон биз ээ. Тэдний нэг бол бидний сайн мэдэх болоод байгаа  “Жи тайм” сүлжээний бизнес юм. Олон хүнийг залилсан гэх үндэслэлээр Казакстан улсаас ядруурлыг бууруулах зорилготой Монголд орж ирсэн “Жи Тайм” корпорацийн Монгол дахь албан ёсны салбарын ерөнхий захирал Ж.Маратыг “Чингис хаан” Олон улсын нисэх онгоцны буудлаас хил гарах гэж байхад нь Эрүүгийн цагдаагийнхан баривчилсан байдаг.

Шалтгаан нь Монгол Улсад олон улсын пирамид хэлбэрээр олон мянган хүнийг элсүүлж мөнгө угаах аргаар дансандаа зургаан тэрбум төгрөг хуримтлуулсан гэсэн үндэслэлээр эрүүгийн хэрэг үүсгэн шалгаж эхэлсэн. Түүнд болон түүний эхнэрт хилийн хориг тавьсан байсан ч эхнэр нь хилээр гарсан бөгөөд харин түүнийг зугтах гэж байхад саатуулсан юм. Улмаар тэдний дансанд дахь зургаан тэрбум төгрөгийг битүүмжилж эцсийн байдлаар хэдэн хүн хохирсон болон хэдэн төгрөгний мөнгө угаасныг тогтоохоор мөрдөн байцаалтын ажилллагаа үргэлжилж байсан.

Харин энэхүү хэргийн мөрдөн байцаалт дуусч Ж.Маратад яллах дүгнэлт үйлдлүүлэх саналтайгаар хэргийг прокурорт  шилжүүлэхээр болжээ. Тэгэхээр олон зуун Монголчуудыг хохироосон энэ хэрэг тун удахгүй шүүхээр шийдвэрлэгдэх бололтой. Дашрамд дурдахад Ж.Маратыг баривчилсаны дараахан “Жи тайм” сүлжээний бизнест орж, их хэмжээний мөнгөө алдаж сэтгэл санаа, эд материалын хохирол амссан иргэдийн мэдээлэл хийж байсан.  Тэд энэхүү сүлжээний бизнесийн үйл ажиллагааг төр хүчээр зогсоосноос болж  олон иргэд хөрөнгө, мөнгөөрөө хохирч үлдлээ. Өөрөөр хэлбэл сүлжээний бизнест итгэж мөнгөө алдсан иргэд төр засгийг буруутгаж байна гэдгээ хэлж байсан.

Уг сүлжээнд гишүүнээр элсэхийн тулд дээрх иргэд өндөр хүүтэй зээл авч, байгаа хөрөнгөө барьцаалсан байсан юм. "Жи тайм" сүлжээнд элсэн орж, хохирсон иргэдийн дунд 30-192  сая төгрөгөөр хохирсон хүмүүс байгаа билээ.

Х.Баатар

ШУУРХАЙ.МН